Հարկային արտոնություններ ինքնազբաղված անձանց համար

1. Եթե ինքնազբաղված անձը ստացել է հարկերից ազատման արտոնագիր, ապա այդ գործունեության տեսակների մասով ազատվում է պետական բյուջե վճարվող հարկերից (եկամտային հարկ, ավելացված արժեքի հարկ և այլն):

Անձը չի ազատվում անշարժ գույքի հարկից, փոխադրամիջոցների գույքահարկից, հողի հարկից, ինչպես նաև ներմուծվող ապրանքների համար գանձվող ավելացված արժեքի հարկից ու մաքսատուրքերից։

Այն մասով, որով անձը ստացել է հարկերից ազատման արտոնություն, նա չի հանդիսանում հարկային գործակալ, հետևապես ազատված է հարկային հաշիվներ դուրս գրելու և հարկային մարմնին հաշվետվություններ ներկայացնելու պարտավորություններից, սակայն, այնուամենայնիվ, կարող է դուրս գրել հաշվարկային փաստաթղթեր:

2. Ո՞վ է ինքնազբաղված անձը

Ինքնազբաղված անձ կարող է ճանաչվել ֆիզիկական անձ ու անհատ ձեռնարկատերերհանդիսացող անձը (ՀՀ քաղաքացի, օտարերկրացի կամ քաղաքացիություն չունեցող անձ)՝ պայմանով, որ․

• բացառապես իրականացնում է օրենքով նախատեսված գործունեության տեսակներից որևէ մեկը (տես՝ ստորև).
• այն իրականացնում է Հայաստանի Հանրապետությունում.
• այն իրականացնում է ինքնուրույնաբար (առանց աշխատող կամ ծառայություն մատուցող ներգրավելու).
• այն իրականացնում է մեկ մշտական վայրի միջոցով, բացառությամբ գործունեության այն տեսակների, որոնք իրենց բնույթով պայմանավորված չեն մշտական վայրով (օրինակ՝ հաճախորդների տներում ծառայությունների մատուցում).
• նրա հասույթը (չհաշված գործատուից ստացած աշխատավարձը) նախորդ օրացուցային տարում չի գերազանցում 9 միլիոն դրամը.
• նա չի հանդիսանում համատեղ գործունեության պայմանագրի կողմ։

3. Գործունեության ո՞ր տեսակների համար է սահմանված հարկային արտոնություն

Արտոնությունը տարածվում է բնակչության պատվերով կատարվող գործունեության հետևյալ տեսակների վրա՝

• կոշիկի և կաշվե գալանտերեայի և համանման այլ արտադրատեսակների արտադրություն, կոշիկի և կաշվե գալանտերեայի պարագաների արտադրություն, կոշիկի և կաշվե արտադրատեսակների նորոգում,
• հագուստի, գլխարկների, գորգերի և գորգագործական արտադրատեսակների, ոչ թանկարժեք զարդերի արտադրություն ու նորոգում,
• փայտյա իրերի պատրաստում, կահույքի և տան կահավորանքի նորոգում,
• համակարգչային ու կենցաղային տեխնիկայի նորոգում, ծրագրային սպասարկում,
• հեծանիվների և հաշմանդամների սայլակների արտադրություն, անձնական օգտագործման և կենցաղային այլ արտադրատեսակների նորոգում,
• տնտեսական և գեղազարդ խեցեգործական արտադրատեսակների, այլ ճենապակե և խեցեգործական արտադրատեսակների արտադրություն, թիթեղագործական գործունեություն,
• ժամացույցների, ժամանակաչափ սարքերի նորոգում, երաժշտական գործիքների նորոգում,
• մասնավոր տնային տնտեսություններում ծառայությունների մատուցում,
• նեղ մասնագիտական գիտելիքների ձեռքբերման այլ դասընթացներ, լեզուների ուսուցման, բարձրագույն և այլ հաստատություններ ընդունվելու համար նախապատրաստական դասընթացներ,
• պարերի, երգեցողության դասավանդում,
• կատարողական արվեստի բնագավառում գործունեություն, կատարողական արվեստի բնագավառում օժանդակ գործունեություն,
• ստեղծագործական գործունեություն, խնջույքավարների գործունեություն
• կրթական գործունեություն և արտադպրոցական դաստիարակություն մարմնամարզության և սպորտի բնագավառում,
• դարբնոցային գործունեություն,
• զբոսաշրջային տների միջոցով հյուրանոցային ծառայությունների մատուցում:

4. Ինչպե՞ս ստանալ հարկային արտոնությունը

Արտոնություն ստանալու համար հաշվառման վայրի հարկային մարմին պետք է ներկայացնել՝

• դիմում(ձևը կա հարկային մարմիններում).
• անձը հաստատող փաստաթուղթ (անձնագիր կամ կացության քարտ կամ փախստականի կոնվենցիոն ճամփորդական փաստաթուղթ) ու դրա պատճենը,

• անհատ ձեռնարկատիրոջ դեպքում՝ նաև գրանցման վկայականն ու դրա պատճենը։

  
  

Հարկերից ազատման արտոնագիրը տրամադրվում է դիմումի օրվան հաջորդող մեկ աշխատանքային օրվա ընթացքում։

5. Ի՞նչ է պետք հիշել դիմումը լրացնելիս

Դիմումը լրացնելիս պետք է ճիշտ նշել՝

• գործունեությունն իրականացնելու կոնկրետ ժամանակահատվածը։ Արտոնությունը սկսում է գործել դիմումի ներկայացման ամսվանից մինչև դիմումում նշված ժամանակահատվածի ավարտը:
• գործունեության այն տեսակը կամ տեսակները, որն (որոնք) անձն իրականացնում է կամ պատրաստվում է իրականացնել։ Դիմումում չնշված գործունեության մասով արտոնությունը չի գործի։
• գործունեության իրականացման վայրը (հասցեն), բացառությամբ գործունեության այն տեսակների, որոնք իրենց բնույթով պայմանավորված չունեն իրականացման մշտական վայր:

Կայք՝ www.adwise.am
Էլ․ հասցե՝ info@adwise.am
Հեռ․՝ 060 54 12 95