Բիզնես սկսելու մասին միֆերը և իրականությունը

Հունիսի 26, 2023

էջանշում

Մեկնաբանություն

Գործարարներից մեկը պատմում է մյուսին, թե ինչպես է սկսել իր բիզնեսը. «Ես վախենում էի իմ բիզնեսը սկսել, բայց իմ նախկին ղեկավարն ինձ լավ մոտիվացրեց՝ ասելով ինձ կյանքիս ամենաոգեշնչող նախադասությունը: Մի օր նա մտավ իմ գրասենյակ և ասաց. «Դուք աշխատանքից հեռացված եք»:

Բնավ կարևոր չէ, թե Դուք ինչ պաշտոն եք զբաղեցնում կամ քանի տարեկան եք, բիզնես սկսելու համար երբեք ուշ չէ, պետք է միայն սկսել: Բիզնեսը բաց դաշտ է, բայց շատերը հավատում են այս գաղափարին հակասող կարծիքին: Այդ իսկ պատճառով այս հոդվածում կխոսենք ստարտափների կարծրացած միֆերի մասին, որոնք կանգնած են Ձեր և Ձեր հաջողության միջև:

Ո՞վ է գործարարը

Միֆ. Գործարար դառնալը շատ ռիսկային է և ինքնին ուղեկցվում է ռիսկով։

Իրականություն. Դուք կարող եք գործարարին թողնել Լաս Վեգասում՝ գումարով լի ճամպրուկով, հաջորդ օրը վերադառնալ նրա ետևից ու տեսնել, որ գումարը չի պակասել:

Ահա՛ թե ինչ ռիսկային են գործարարները: Նրանք ավելի շատ հաշվարկ են անում մինչև շուկա վերջնական մուտքը, քան որևէ այլ անձ: Նրանց մոտ ամեն ինչ պլանավորված է, գծված և առաջխաղացման ոչ մի հնարավորություն չի խուսափում իրենց հետևողական հայացքից: Ինչպես ասում են՝ 7 չափի՛ր, 1 կտրի՛ր:

Գործարար դառնալու ռիսկը կայանում է նրանում, որ նրանք փորձում են այն ամենն ինչ նոր է, տարբերվող և դեռ փորձված չէ:

Ինչպե՞ս սկսել

Միֆ. Ձեր բիզնես ծրագիրը պետք է պատրաստ լինի մինչև բիզնես գործունեություն սկսելը:

Իրականություն. Բիզնես պլանը կառուցվում է ժամանակի ընթացում:

Հաջողակ գործարարների 70 %-ը սկսել են առանց կատարյալ բիզնես պլանի:

Եկե՛ք հասկանանք սրա իմաստը: Իհարկե, բիզնես ծրագիր ունենալը կենսական նշանակություն ունի բիզնեսի համար, այն օգնում է հասկանալ, թե որն է բիզնեսի թիրախային լսարանը, սահմանում է կարճաժամկետ և երկարաժամկետ նպատակներ, գնահատում է ճյուղի մրցակցությունը, օգնում է շրջանցել անցյալում կատարված սխալները և գնահատել ֆինանսավորումը, բայց այն փոփոխվում և վերակառուցվում է յուրաքանչյուր փուլում:

Ի՞նչ գաղափար առաջարկել

Միֆ. Եթե կա լավ գաղափար, հաղթանակն ապահովված է:

Իրականություն. Լավ գաղափարի՝ հաջողության գրավական լինելու պնդումն այնքան սխալ չէ, ինչքան մոլորեցնող: Գաղափարն ինքնին կարևոր է, բայց նույնիսկ ամենալավ գաղափարը ոչինչ է առանց գրագետ թիմի, պլանավորման, առաջնորդության, հաղորդակցության և մի շարք այլ գործոնների:

Սովորաբար մարդիկ տարիներ են կորցնում հիանալի գաղափարի փնտրտուքների վրա՝ կարծելով, որ դա է ստարտափի միակ շարժիչ ուժը։ Պետք չէ ֆիքսվել անթերի գաղափար ունենալու վրա, երբեմն թիմն ավելի կարևոր է.

«Ավելի լավ է ունենալ միջին գաղափար, բայց աշխատել գիտակ և լավ թիմում, քան աշխատել բարդ և չմոտիվացված անձանց հետ, բայց ունենալ փայլուն գաղափար»:

Ինչու՞ երբեք ուշ չէ սովորել

Միֆ. Գործարարը պետք է իմանա ամեն ինչ և ունենա յուրաքանչյուր հարցի պատասխանը:

Իրականություն. Գործարարներն ամենատես չեն և չեն զբաղվում գուշակություններով: Հենց այստեղ է կարևորվում իրազեկ թիմի և ինքնազարգացման դերը: Իրական գործարարը բարգավաճում է ուսումնառության մշտական վիճակում գտնվելով: Հիշե՛ք, որ հաջողության հասնելու ճանապարհին շատ կարևոր է նոր հնարավորությունների օգտագործումն ու գիտելիքների ձեռք բերումը:

Որտե՞ղ և ե՞րբ ծավալել գործունեությունը

Միֆ. 21-րդ դարը տեխնոլոգիայի դար է և հաջողության կարելի է հասնել միայն IT ոլորտում, ու դա պետք է անել ճիշտ պահին:

Իրականություն. Նորարարությունը յուրաքանչյուր ոլորտում կարևորվում է այնքան, որքան IT ոլորտում: Պետք չէ սպասել ճիշտ պահին, այն կարող է և չգալ: Դրա փոխարեն ինքներդ ստեղծե՛ք Ձեր հաջողակ վայրկյանը:

Մեկ խորհուրդ. Սատկած ձիու վրայից ժամանակին իջե՛ք: Նկատի ունեցե՛ք, երբ բիզնեսն ապագա չունի, անհրաժեշտ է խուսափել ավելորդ ծախսերից։

Սակայն սա վհատվելու առիթ չէ, հին գաղափարին կգա փոխարինելու նորը և Դուք կփորձե՛ք կրկին:

Հաջողությունը զբոսանք է՝ ձախողումից դեպի ձախողում` առանց սկզբնական խանդավառության կորստի:

Ուինսթոն Չերչիլ Քաղաքական գործիչ

Տարածել հոդվածը