Թվային բիզնեսի սահմանումը

Այսօր հաճախորդների կարծիքներն ավելի ազդեցիկ են, քան երբևէ։ Վերջիններս ակնկալում են արագ մատուցվող և անհատական ծառայություններ՝ ունենալով ընտրություն կատարելու անսահմանափակ հնարավորություններ։ Թվային տեխնոլոգիաները բոլոր չափերի բիզնեսների համար ստեղծում են հավասար հնարավորություններ և թույլ են տալիս վերջիններիս հանդես գալ աննախադեպ նորարարություններով, տալիս են մինչ այդ աներևակայելի արտադրանքներ ու ծառայություններ մշակելու հնարավորություն: Բիզնեսի մեծությունը, որը մի ժամանակ մրցակցային առավելություն էր, կարող է դառնալ խոչընդոտ, քանի որ շուկայում գերիշխող դիրք զբաղեցնող ընկերություններն այժմ հաճախ պայքարում են նորաստեղծ և ճկուն սթարթափերից ետ չմնալու համար։ Թվային փոխակերպման վերելքը բիզնեսների համար ստեղծում է բոլորովին նոր խաղի կանոններ և կտրուկ փոխում է մրցակցային դաշտը։

Ըստ տեխնոլոգիական հետազոտություններով զբաղվող խոշորագույն կազմակերպության՝ Գարթների սահմանման՝ «Թվային բիզնեսը ձեռնարկատիրության նոր մոդել է, որն առաջանում է թվային և ֆիզիկական աշխարհների միաձուլման արդյունքում՝ խափանելով բոլոր գործող բիզնես մոդելները»։

Միայն պատկերացրեք այս ամենի արդյունքում ստեղծվող հնարավորությունները. խելացի համակարգեր, որոնք կարող են հուսալիորեն կանխատեսել արդյունքներ, ավելի մեծ ճշգրտությամբ կանխագուշակվող հաճախորդների կարիքներ, թվային տարրերով հարստացված ֆիզիկական փորձառություններ, գործառնություններ, որ առավել ճկուն և դինամիկ են շուկայի նկատմամբ, ինչպես նաև նորարարական ապրանքներ և ծառայություններ, որոնց ստեղծմանը կմասնակցեն արժեշղթայի մաս հանդիսացող հաճախորդները և գործընկերները։

Ստորև ներկայացված են թվային բիզնեսի ամենատարածված չորս բնութագրիչները.

Քրաուդսորսինգի և տվյալների հետ աշխատելու նորարարական եղանակներ. կազմակերպությունները փոխում են արտադրանքներ և ծառայություններ մշակելու և մատուցելու իրենց եղանակները՝ ինտեգրելով հաճախորդներին, աշխատակիցներին և բիզնես էկո-համակարգի արձագանքն իրենց զարգացման գործընթացում։

Ճկուն բիզնես՝ հիմնված խելամիտ գործառույթների վրա. ձեռնարկություններն այսօր դառնում են ավելի ճկուն և արագ արձագանքող՝ հնարավոր դարձնելով իրենց բիզնեսի և գործառնությունների արագ ձևափոխումն՝ ըստ շուկայի պահանջների։

Աշխատել ավելի խելացի՝ խելացի մեքենաների հետ. մեքենաների ուսուցումը (machine learning) և խորացված վերլուծությունները (advanced analytics) թույլ են տալիս կազմակերպություններին կանխատեսել հաճախորդի կարիքները և շուկայական փոփոխությունները։

Գոհացնել հաճախորդին՝ տալով ավելի հարուստ փորձառություն. Հաճախորդին ավելի հարուստ փորձառություն տալու համար բիզնեսներն այսօր օգտագործում են թվային տեխնոլոգիաները՝ ինտերակտիվ էկրաններ, երկրորդ էկրանի ռազմավարություն և բջջային հեռախոսներին ուղարկվող անհատական առաջարկներ։.

Կայք՝ www.microsoft.com/hy-am/about
Էլ. Հասցե՝ arminfo@microsoft.com
Հեռ.՝ 010 51-44-89