Կազմակերպության վերակազմակերպում

Հունվարի 14, 2021

էջանշում

Մեկնաբանություն

Իրավաբանական անձի վերակազմակերպում

Իրավաբանական անձանց վերակազմակերպումը կարող է տեղի ունենալ միաձուլման, միացման, բաժանման, առանձնացման ու վերակազմավորման միջոցով, որոնց մասին կխոսվի ստորև։

Որպես կանոն իրավաբանական անձանց վերակազմակերպումը իրականացվում է կամավոր՝ հետևյալ պատճառներով.

իրավաբանական անձի կառավարման արդյունավետության բարձրացման անհրաժեշտություն
նոր ակտիվների ձեռքբերում
լավագույն արդյունքների հասնելու նպատակով՝ իրավաբանական անձանց ակտիվների միավորում և այլն

Իրավաբանական անձանց վերակազմակերպումը կարող է իրականացվել նաև դատարանի վճռով՝ ազատ տնտեսական մրցակցության պաշտպանության նպատակով։ Դա որպես կանոն վերաբերում է առավել խոշոր ձեռնարկություններին:

Վերակազմակերպման ձևերը

ՄԻԱՁՈՒԼՈՒՄ
Երկու կամ ավել իրավաբանական անձինք միաձուլվում են, ինչի արդյունքում ստեղծվում է նոր իրավաբանական անձ, որին փոխանցվում է այդ իրավաբանական անձանց իրավունքները և պարտականությունները: Միաձուլման արդյունքում այն իրավաբանական անձինք, որոնք միաձուլվել են, դադարում են իրենց գործունեությունը:

ԲԱԺԱՆՈՒՄ
Արդեն գոյություն ունեցող իրավաբանական անձը բաժանվում է երկու կամ ավել նոր իրավաբանական անձանց, ինչի արդյունքում իրավաբանական անձի գոյությունը դադարում է, իսկ դրա իրավունքները և պարտականությունները նախապես որոշված ծավալներով փոխանցվում են բաժանման արդյունքում ստեղծված նոր իրավաբանական անձանց:

ԱՌԱՆՁՆԱՑՈՒՄ
Արդեն գոյություն ունեցող իրավաբանական անձից(որի գոյությունը շարունակվում է)առանձնանում են մեկ կամ մի քանի նոր իրավաբանական անձինք, որոնց փոխանցվում է վերակազմակերպվող իրավաբանական անձի որոշ իրավունքները և պարտականությունները:

ՎԵՐԱԿԱԶՄԱՎՈՐՈՒՄ
Իրավաբանական անձի կազմակերպաիրավական ձևի փոփոխությունն է: Վերակազմավորման դեպքում նախկին ձևով գործող իրավաբանական անձի գոյությունը դադարեցվում է և ստեղծվում է նոր ձևով իրավաբանական անձ, ում փոխանցվում են նախորդի բոլոր իրավունքներն ու պարտականությունները: Օրինակ՝ սահմանափակ պատասխանատվությամբ ընկերությունը կարող է վերակազմավորվել բաժնետիրական ընկերության կամ առևտրային կոոպերատիվի և հակառակը:

ՄԻԱՑՈՒՄ
Մեկ կամ մի քանի իրավաբանական անձինք միանում են մեկ այլ՝ արդեն գոյություն ունեցող իրավաբանական անձի՝ վերջինիս փոխանցելով իրենց բոլոր իրավունքներն ու պարտականությունները։ Միացման արդյունքում դադարեցվում է միացող իրավաբանական անձի (անձանց) գործունեությունը։

Ինչպե՞ս իրականացնել վերակազմակերպումը

Վերակազմակերպումը իրականացված է համարվում իրավաբանական անձանց ռեգիստրի գրանցամատյանում վերակազմակերպման արդյունքում ստեղծվող և գործունեությունը դադարեցնող կազմակերպությունների վերաբերյալ համապատասխան գրառումները կատարելու պահից:

Որոշ դեպքերում ընկերության միաձուլման կամ միացման ձևով վերակազմակերպումը կարող է իրականացվել միայն լիազորված պետական մարմնի թույլտվությամբ:

Իրավաբանական անձանց միաձուլման, միացման և վերակազմավորման ձևերով իրականացված վերակազմակերպման դեպքում իրավունքները և պարտականությունները փոխանցվում են փոխանցման ակտին համապատասխան, իսկ բաժանման և առանձնացման դեպքում՝ բաժանիչ հաշվեկշռին համապատասխան: Այդ իսկ պատճառով վերակազմակերպման ընթացքում հաշվապահական հաշվառման և հաշվետվությունների տվյալների արժանահավատությունն ապահովելու նպատակով պարտադիր է ընկերությունում անցկացնել ակտիվների և պարտավորությունների գույքագրում: