Գնագոյացման 5 ծուղակներ

Հունվարի 14, 2021

էջանշում

Մեկնաբանություն

Ապրանքների կամ ծառայությունների համար ճիշտ սահմանված գինը թույլ է տալիս կազմակերպություններին մեծացնել վաճառքի ծավալները և ստեղծել հավատարիմ հաճախորդների բազա:

Մինչդեռ սխալ ընտրված գինը կարող է ստեղծել մի իրավիճակ, որտեղ կազմակերպությունը պետք է պայքարի, որպեսզի կարողանա հասնել եկամտաբերության: Ապրանքի կամ ծառայության գինը սահմանելիս խուսափե՛ք ստորև ներկայացված 5 ծուղակներից.

1․ Չեք հաշվարկում բոլոր ծախսերը

Իրատեսական գին սահմանելու համար անհրաժեշտ է իմանալ ապրանքի կամ ծառայության ստեղծման ժամանակ առաջացող բոլոր ծախսերը՝ ներառյալ ապրանքի տարբեր մասնիկների և պաշարների ծախսերը, ինպես նաև ոչ նյութական ակտիվների ծախսերը, ինչպես օրինակ՝ աշխատակիցների գիտելիքները և հմտությունները: Շատ ձեռնարկատերեր սահմանում են գին, որը չի ներառում վերադիր ծախսերը, ինչպես օրինակ՝ վարձավճարները կամ էլեկտրաէներգիայի վճարը: Եթե Դուք կամայական գին սահմանեք, որը կապ չունի Ձեր կատարված ծախսերի հետ, ապա բարդ կլինի որոշել գների փոփոխման ճիշտ ժամանակը:

2․ Հետևում եք մրցակիցներին

Գին սահմանել՝ հիմնվելով մրցակիցների կողմից առաջարկված գնի վրա՝ ռիսկային է, քանի որ ծախսերը, որոնք մրցակիցները ներառում են գնի մեջ, կարող են չհամապատասխանել Ձեր կողմից կատարված ծախսերին: Նրանք կարող են մատակարարներին ավելի շատ կամ քիչ վճարել, ձեռք բերել նոր տեխնոլոգիաներ կամ ունենալ մարքեթինգային մեծ կամ փոքր բյուջե: Սակայն մրցակիցների գներին ծանոթ լինելը, նույնպես կարևոր է վստահ լինելու համար, որ Ձեր կողմից սահմանված գինը իրատեսական է շուկայում: Եթե նկատում եք, որ Ձեր ապրանքի կամ ծառայության գինը շատ ավելի ցածր է, քան մրցակիցներինը, ստուգեք, թե արդյո՞ք բաց չեք թողել որևէ ծախս, որը պետք է ներառվեր գնի մեջ:

3․ Գնային մրցակցություն

Մրցակիցներից առաջ անցնելու համար ցածր գին սահմանելով՝ Դուք հնարավոր է նոր գնորդներ ձեռք բերեք, սակայն պահել նրանց որպես հավատարիմ հաճախորդ, հնարավոր չէ: Եթե ցածր գինը գրավել է նրանց, ապա առաջին իսկ գրավիչ առաջարկի դեպքում նրանք կլքեն Ձեր ընկերությունը: Ավելի ճիշտ մոտեցում է մրցակիցներից տարբերվել մի շարք առավելություններով, ինչպես օրինակ՝ հաճախորդների սպասարկման որակի բարձրացում, ապրանքի որակի և հատկանիշների բարելավում:

4․ Չեք բարձրացնում գինը

Բարձր պահանջարկը կամ աճող ծախսերը ստեղծում են մի իրավիճակ, որտեղ Դուք պետք է որոշեք. բարձրացնել գինը, թե թողնել նույնը: Որոշ ձեռնարկատերեր խուսափում են գների բարձրացումից՝ մտածելով, որ հաճախորդները բացասաբար կարձագանքեն փոփոխությանը: Ամեն դեպքում ավելի ճիշտ քաղաքականություն է պարբերաբար բարձրացնել գինը փոքր մասնաբաժիններով, քան անսպասելիորեն բարձրացնել գինը:

10% գնի բարձրացումը ավելի բացասական արձագանք կունենա, քան 2 անգամ 5% գնի բարձրացումը:

5․ Իջեցնում եք գինը առանց պայմանների փոփոխության

Որոշ հաճախորդներ կփորձեն ավելի հարմար պայմաններով ապրանք կամ ծառայություն ձեռք բերել Ձեր կազմակերպությունից: Նախապես պայմանավորված գնից ավելի ցածր գնով պատվերի կատարումը, հնարավոր է ազդակ լինի, որ Ձեր նախնական գինը չափազանց բարձր էր, և բոլոր հետագա գործարքները կարող են դառնալ սակարկելի: Ավելի ճիշտ մոտեցում է սահմանել ցածր գին, բայց փոփոխել մատուցման պայմանները: Օրինակ՝ Դուք կարող եք սակարկել և իջեցնել միավորի գինը ավելի մեծ ծավալի դեպքում:

Տարածել հոդվածը