Գին և արժեք (value՝ օգուտ հաճախորդի համար)

Շուկայում ներկայացված են միլիոնավոր միմյանցից տարբերվող ապրանքներ և ծառայություններ: Գնումներ կատարելիս առաջին միտքը, որ առաջանում է պոտենցիալ հաճախորդների մոտ, այն է թե որքան է այդ ապրանքի գինը և արդյոք արժե վճարել այդքան գումար դրա դիմաց: Անհրաժեշտ է միմյանցից տարբերել գին և արժեք (value` օգուտ հաճախորդի համար) հասկացությունները:

Գին

Գինը որևէ ապրանքի կամ ծառայության դիմաց գնորդի կողմից տրված դրամային միավորի չափն է, այսինքն ապրանքի արժեքի դրամային արտահայտությունը: Գումարը, որը վճարում եք վաճառողին ապրանքի դիմաց, իր մեջ ներառում է ինքնարժեքը և ակնկալվող շահույթը: Ինքնարժեքը, ապրանքի ստեղծման համար օգտագործված գումարի չափն է, որը դրամական ձևով արտահայտում է ապրանքի արտադրության և իրացման վրա կատարված ընթացիկ բոլոր ծախսերը։ Օրինակ՝ արտադրամասի վարձակալության վճար, աշխատուժ, էլեկտրաէներգիայի վարձավճար, հումքանյութեր և այլն: Շահույթը ֆինանսական օգուտ է, որը հաշվարկվում է ընկերության հասույթից հանելով ընդհանուր ծախսերը: Շահույթի ստացումը հանդիսանում է ձեռնարկության գործունեության հիմնական նպատակը:

Արժեք (value` օգուտ հաճախորդի համար):

Արժեքը սպառողի համար ապրանքից ստացվող օգուտն է: Այն երբեք չի կարող հաշվարկվել դրամային արտահայտությամբ և սպառողի վարքագծից և սովորություններից կախված կարող է տարբերվել: Այն ցույց է տալիս, թե որքանով արժեր ձեռք բերել ապրանքը կամ օգտվել մատուցվող ծառայությունից: Ի տարբերություն գնի՝ արժեքը կարող է տարատեսակ կարծիքներ ունեցող հաճախորդների համար տարբեր լինել:

Ստորև ներկայացված է գին և արժեք համեմատության աղյուսակը: