Ո՞րն է Ձեր բրենդի արքետիպը

Հիմնվելով հոգեբանության վրա և արտացոլելով սպառողի արժեհամակարգն ու ցանկությունները՝ արքետիպերը ամուր կապեր են հաստատում լսարանի հետ և խթանում են բրենդի նկատմամբ վստահության ամրապնդմանը: Արքետիպերի դերը առանցքային է մարքեթինգում, քանի որ դրանց հիման վրա է ստեղծվում բրենդի ինքնությունը, ինչն էլ իր հերթին օգնում է ճիշտ դիրքավորել բիզնեսը և ապահովում է մրցակցային առավելություն շուկայում։

Բրենդի արքետիպը ձևավորում է հաճախորդների ընկալումը բրենդի մասին և օգնում է հուզական կապ ստեղծել թիրախային լսարանի շրջանակում: Արքետիպերը հնարավորություն են տալիս բովանդակալից և կայուն հարաբերություններ հաստատել հաճախորդների հետ՝ հիմնվելով թիրախային լսարանի թաքնված ցանկությունների, դրդապատճառների ու ձգտումների վրա։

Առանձնացվում են բրենդի 12 արքետիպեր, որոնք իրենց նպատակային ուղղվածությամբ բաժանվում են 4 խմբի՝

• կապ հաստատել ուրիշների հետ,
• լինել համակարգային,
• կարևորել փորձը,
• թողնել հետք։

Արքետիպերը կարելի է համեմատել մարդկանց կերպարների հետ: Օրինակ, եթե ցանկանում եք, որ Ձեր բրենդը ընկալվի որպես «հերոս», ապա անհրաժեշտ է, որ այն արտահայտի ուժ, վստահություն և համարձակություն: «Հերոս» արքետիպը ունեցող բրենդները ստեղծվում են մարտահրավերներ հաղթահարելու և մարդկանց ոգևորելու համար՝ ցույց տալով, որ չկան անլուծելի խնդիրներ:

Հետևեք այս քայլերին՝ Ձեր բրենդի արքետիպը որոշելու և հիշվող ինքնություն ստեղծելու համար.

• Ներբեռնեք ու պահպանեք ֆայլը` բրենդի 12 արքետիպերին ծանոթանալու համար։
• Թիմով քննարկեք, թե ինչպես եք ցանկանում ընկալվի բրենդը և ինչ զգացողություններ այն առաջացնի մարդկանց մոտ։ Այս կերպ կպարզեք, թե որն է Ձեր բրենդի արքետիպը։
• Բրենդի արքետիպը որոշելուց հետո կարևոր է նաև հասկանալ դրա կիրառությունը պրակտիկայում․ բրենդի արքետիպին համապատասխան հաղորդակցությունների տոնը և ոճը հեշտացնում և առավել արդյունավետ է դարձնում մարքեթինգային ռազմավարությունները, արշավների մշակումը ու հաճախորդների հետ շփումները:

Հստակեցնելով Ձեր բրենդի արքետիպը՝ Դուք կարող եք ավելի կայուն հարաբերություններ ստեղծել Ձեր լսարանի հետ` արդյունքում ունենալով ավելի հզոր ու հիշվող բրենդ: