Գործարար կապերի հաստատումը բիզնեսում

Երկարատև հարաբերություններ ստեղծելով կարելի է ձեռք բերել գործարար կապերի հաստատման հմտություն, որը շատ կարևոր է թե՛ անձնական, թե՛ մասնագիտական կյանքի համար: Գործարար կապերի հաստատումը փոխշահավետ փոխհարաբերություններ ստեղծելն է գործարար մարդկանց և պոտենցիալ հաճախորդների հետ, որի հիմնական նպատակն է ձեռք բերել նոր հաճախորդներ և գործընկերներ և պատմել Ձեր բիզնեսի մասին:

Հիմնական օգուտները

• Նոր ծանոթություններ։ Գործարար կապերի հաստատման շնորհիվ կարող եք ծանոթանալ պոտենցիալ հաճախորդների հետ, այնուհետև կապ պահելով դասել նրանց Ձեր հիմնական հաճախորդների շարքին: Նոր ծանոթությունները հնարավորություն են ընձեռում նաև ձեռք բերել նոր գործընկերներ և հաստատել փոխշահավետ գործնական հարաբերություններ:
• Տեսանելիություն։ Մասնակցելով networking միջոցառումների կարող եք ներկայացնել Ձեր բիզնեսը և կարող եք հայտնվել այլ գործարար մարդկանց ուշադրության կենտրոնում:
• Փորձի փոխանակում և գիտելիքի ձեռքբերում։ Շատ դեպքերում նոր բիզնես սկսելուց առաջ գործարարները ունենում են խորհրդի կարիք այն մարդկանցից, ովքեր տեղյակ են տվյալ շուկայից և ունեն համապատասխան փորձ: Այսպիսով, նոր գործարար կապեր  հաստատելով բազմաթիվ խնդիրներ և մտավախություններ կապված Ձեր բիզնեսի հետ կարող են լուծում ստանալ: Դուք նաև հնարավորություն կունենաք կիսվելու Ձեր անձնական փորձով և գիտելիքներով այն անձանց հետ, ովքեր ունեն դրանց կարիքը:
• Վստահության ձեռքբերում։ Հաճախ գործարարները չունեն բավականաչափ վստահություն նոր բիզնես սկսելու կամ արդեն իսկ գործող բիզնեսի հետագա զարգացումը պլանավորելու համար: Հանդիպումները հաջողության հասած գործարարների հետ կօգնեն Ձեզ ձեռք բերել վստահություն՝ Ձեր նպատակներին հասնելու և Ձեր բիզնեսը զարգացնելուհամար:

Գործարար կապերի հաստատման հիմնական կանոնները

• Ժամանել միջոցառմանը 10-15 րոպե շուտ և միջոցառման ավարտից հետո անմիջապես չհեռանալ: Սա հնարավորություն կտա հաստատել նաև ոչ ֆորմալ ծանոթություններ:
• Միջոցառմանը մասնակցելուց առաջ սահմանել հստակ նպատակներ:

• Պարտադիր Ձեզ հետ ունենալ համապատասխան դիզայնով և անձնական տվյալներով այցեքարտ, որը հետագայում հնարավորություն կտա կապ հաստատել այլ անձանց հետ:
• Ուշադրություն դարձնել զրույցի ժամանակահատվածին: Անհրաժեշտ է խոսել 2-5 րոպե յուրաքանչյուր անձի հետ , պետք չէ ներկայացնել Ձեր անձի կամ բիզնեսի հետ կապված բոլոր մանրամասները, զրույցի նպատակը կարճ ինֆորմացիայի և կոնտակտների փախանակումն է:
• Պետք է ուշադիր լսել զրուցակցին, ոչինչ չպետք է խանգարի զրույցի ընթացքին:
• Պարտադիր պետք է հարցնել զրուցակցի անունը և մտապահել, քանի որ շատ հաճախ զրույցի ընթացքում մոռանում եք անունը և առաջանում են զրուցակցին դիմելու հետ կապված խնդիրներ:

Պետք է տալ միայն բաց հարցեր, այսինքն այնպիսի հարցեր, որոնք ունեն տրամաբանական շարունակություն և չեն սահմանափակվում միայն այո կամ ոչ պատասխանելով, ինչը իր հերթին հնարավորություն կտա զրույցի շարունակական լինելուն: Այսպիսով, գործարար կապերի հաստատման միջոցով կկարողանաք մեծացնել հաճախորդների քանակը, ունենալ բիզնեսի աճ և մեծացնել Ձեր բիզնեսի շահույթը: