Քոուչինգի ազդեցությունն աշխատակիցների մոտիվացիայի վրա

Քոուչինգի միջազգային ֆեդերացիայի (ICF) կողմից իրականացված հետազոտությունները և ոլորտի մի շարք հետազոտություններ ցույց են տվել, որ կազմակերպությունները, որոնք ներդրել են քոուչինգի մշակույթն իրենց բիզնես գործընթացներում`

• Գրանցել են 27% կյանքի և աշխատանքի հավասարակշռության աճ համեմատած այն կազմակերպությունների, որոնք չեն աշխատում քոուչերի հետ։
• Հարցվողների 70%-ը պատասխանել են, որ նկատում են դրական աճ կատարողականի մեջ։
• Հետազոտությանը մասնակցած կազմակերպությունների 86%-ը նկատել է ներդրումների վերադարձի աճ։

Լինի դա առաջնորդության, բիզնեսի, թե կարիերիային ուղղված՝ քոուչինգի դրական ազդեցությունն աշխատակիցների մոտիվացիայի և կատարողականի վրա անհերքելի է։ Ահա թե ինչպես`

1․ Աշխատակիցները պահպանում են աշխատանք-կյանք բալանսը

Սթրեսը և աշխատանք-կյանք բալանսի խախտումը զգալի ազդեցություն են թողնում աշխատակցի առողջության, մոտիվացիայի և կատարողականի վրա: Քոուչի հետ աշխատանքն օգնում է աշխատակիցներին սահմանել առաջնահերթությունները, կառավարել ժամանակն ու բարձրացնել ինքնավստահությունը։ Այս ամենի արդյունքում աշխատակիցներն ավելի կենտրոնացված են դառնում երկարաժամկետ արդյունքների վրա։

2․ Աշխատակիցները դառնում են ավելի ներգրավված կազմակերպության գործընթացներում

Թե՛ անհատական, և թե՛ թիմային քոուչինգի մշակույթը կազմակերպությունում ներդնելը նշան է աշխատակիցների համար, որ կազմակերպությունը ներդրում է կատարում նրանց մասնագիտական զարգացման մեջ։ Այսպես, աշխատակիցներն ավելի պատրաստակամ են դառնում նոր հմտություններ ձեռք բերելու հարցում, և ավելի քիչ հավանական է, որ տվյալ կազմակերպությունը կբախվի աշխատակիցներ կորցնելու խնդրին։

3․ Աշխատակիցները քաջատեղյակ են դառնում իրենց ուժեղ և թույլ կողմերի մասին

Քոուչի հետ աշխատանքը խթանում է ինքնավերլուծությունը։ Երբ աշխատակիցները լավ են գիտակցում իրենց ուժեղ և թույլ կողմերը, նրանք ավելի պատրաստ են դիմակայելու մարտահրավերներին, ինքնակրթվել, և աշխատել մասնագիտական հմտությունների զարգացման ուղղությամբ։ Արդյունքում, ձևավորվում է այնպիսի աշխատանքային միջավայր, որտեղ աշխատակիցներն ավելի վստահ են, թիմային և ճկուն։

4․ Աշխատակիցները զարգացնում են փափուկ հմտությունները

Փափուկ հմտությունները գնալով ավելի են կարևորվում, քան բուն մասնագիտական հմտությունները։ Քոուչինգն այս հարցում ևս ունի դրական ազդեցություն։ Օրինակ՝ քոուչները կարող են օգնել աշխատակիցներին արտահայտել կառուցողական մտքեր, լսել ուրիշների տեսակետները, համագործակցել, կառավարել հուզական ինտելեկտը, վերլուծել խնդիրները և այլն։

5․ Աշխատակիցները կարողանում են սահմանել հստակ նպատակներ

Քոուչինգի արդյունքում աշխատակիցները կարողանում են սահմանել երկարաժամկետ և կարճաժամկետ նպատակներ՝ միաժամանակ սահմանելով գործողությունների պլան դրանց իրականացման, և հետագայում նաև արդյունքների չափման տեսանկյունից։ Թեև անմիջական ղեկավարները ևս օգնում են, սակայն որպես այդպիսին նրանք կենտրոնանում են կարճաժամկետ արդյունքի վրա, քանի որ նրանց առաջնահերթությունն է թիմի ընդհանուր նպատակը։

Քոուչը չի հանդիսանում ավելի բարձր պաշտոնով մեկը, ինչը քոուչ-աշխատակից հարաբերությունները լիովին տարբերում է ղեկավար-աշխատակից հարաբերություններից։

6․ Ամրապնդվում է թիմի միասնությունը

Քոուչինգի մշակույթը կարող է նաև նպաստել թիմի ներսում փոխադարձ վստահության և համագործակցության ամրապնդմանը: Անհատական հանդիպումների միջոցով աշխատակիցները սովորում են ավելի լավ հասկանալ միմյանց, ինչը նպաստում է միասնական և համախմբված թիմի ձևավորմանը:

Օրինակ՝ թիմային քոուչինգի արդյունքում աշխատակիցները սովորում են արդյունավետ հաղորդակցման և կոնֆլիկտների կառավարման մեթոդներ, ինչը կրճատում է ներքին լարվածությունը:

Այսպիսով, ճիշտ կազմակերպված քոուչինգը մղում է աշխատակիցներին ինքնազարգացման, տալիս է հնարավորություն հպարտանալ իրենց կատարած աշխատանքով, ինչը հանգեցնում է աշխատանքից բավարարվածության և արտադրողականության բարձրացման:

Կայք՝ uteach.io

Էլ. հասցե՝ support@uteach.io

Հեռ.՝ +374 55 85 55 88