Ինչպե՞ս աշխատանքի ընդունել նոր աշխատակից

Այս բաժնում կծանոթանաք աշխատակիցների՝ աշխատանքի ընդունելու համար իրականացվող քայլերին և դրանց առանձնահատկություններին։

Քայլ 1․ Մշակել արդյունավետ աշխատանքային նկարագիր

Մինչ անձնակազմի ընտրության գործընթացը սկսելը անհրաժեշտ է մշակել հստակ աշխատանքային նկարագիր, որը հետագայում կօգնի բացահայտել և ընտրել լավագույն թեկնածուներին մի շարք դիմորդներից։ Աշխատանքային նկարագիրը հիմնականում ներառում է 2 բաղադրիչներ՝ աշխատանքային պարտականությունների և պահանջվող որակավորումների ամփոփ նկարագիր։ Արժե հատկացնել ժամանակ և ստեղծել լիարժեք աշխատանքային նկարագիր, քանի որ պետք է վստահ լինեք, որ գիտեք, թե ինչ գործառույթ է կատարելու անձը այդ պաշտոնում: Նաև պետք է ներկայացնեք այն այնպես, որ դիմորդի և Ձեր պատկերացումները աշխատանքի մանրամասների վերաբերյալ առավելագույնս համապատասխանեն։

Անձնակազմի ընտրության գործընթացը արդյունավետ կերպով իրականացնելու և ցանկալի թեկնածուին գտնելու համար խորհուրդ ենք տալիս հաշվի առնել հետևյալ խորհուրդները՝

Խուսափե՛ք անորոշությունից

Աշխատանքային գործառույթներն ու պարտականությունները նկարագրեք առավելագույնս հստակ։ Օրինակ՝ կոշիկ արտադրող կազմակերպության պարագայում «ապրանքների վաճառքի իրականացում»-ի փոխարեն ճիշտ է նշել՝ «ներկայացնել կազմակերպության արտադրանքը հաճախորդներին ընկերության վաճառքի սրահներում, օգնել հաճախորդներին ընտրել իրենց համապատասխանող ձև և չափ»։

Դասակարգե՛ք առաջնահերթություն

Գործառույթների և պարտականությունների հստակ սահմանումից հետո դասակարգեք դրանք ըստ կարևորության։ Այս սկզբունքը կընձեռի հնարավորություն տարանջատելու այն, ինչը անխուսափելիորեն անհրաժեշտ է աշխատանքային պարտականությունների կատարման համար, այն, ինչը ցանկալի է, ինչը կարող է հանդիսանալ առավելություն և ինչն է ոչ տեղին։

Քննարկե՛ք աշխատանքային նկարագիրը տվյալ պաշտոնի հետ առնչվող անձնակազմի հետ

Քննարկեք աշխատանքային նկարագիրը այն մարդկանց հետ, ովքեր ի պաշտոնե առնչվելու են տվյալ աշխատակցի հետ կամ ղեկավարելու են նրան։ Արդյունքում՝ առավել լավ կպատկերացնեք, թե պրակտիկ աշխատանքային առօրյայում որոնք են հանդիսանալու տվյալ աշխատակցի հիմնական գործառույթները։

Քայլ 2․ Մշակել գրավիչ և արդյունավետ աշխատանքային հայտարարություն

Աշխատանքի հայտարարությունը հավանական թեկնածուի և կազմակերպության միջև առաջին կապն է։ Հետևաբար աշխատանքային հայտարարությունը պետք է օգտագործել որպես գործիք՝ գրավելու ամենահամապատասխան թեկնածուներին, որպեսզի հայտարարություն ընթերցողը ցանկանա կազմակերպության մաս հանդիսանալ։

Աշխատանքային հայտարարությունում անհրաժեշտ է՝

• Նկարագրել կազմակերպությունը և պաշտոնը
• Տրամադրել աշխատանքի հակիրճ նկարագիր

Հայտարարությունում ներառեք աշխատանքի սեղմ նկարագիր, որպեսզի ընթերցողը հասկանա, թե ինչ է ակնկալվում աշխատակցից տվյալ պաշտոնում։ Օրինակ կարող եք ասել՝ «Ընտրված աշխատակիցը պատասխանատու կլինի հաճախորդների բացահայտման, տաք զանգեր կատարելու, գործնական հարաբերություններ ստեղծելու համար»։

• Նշել աշխատանքային պարտականություններից և պատասխանատվություններից 4-5 առավել կարևորները
• Նկարագրել կրթությանը և փորձին առնչվող պահանջները

Նշեք կրթությանը և մասնագիտական փորձին ներկայացվող պահանջները, ինչը կօգնի առավել կրճատել անհամապատասխան դիմորդների քանակը։

• Ներառել աշխատանքի վայրի մասին տեղեկատվություն
• Տարանջատել «պետք է տիրապետեք»-ները, «նախընտրելի է, որ տիրապետեք»-ներից
• Տրամադրել հեռախոսահամար կամ էլ․ հասցե հարցումների համար
• Ամբողջացնել հայտարարությունը՝ նշելով աշխատանքի համար դիմելու գործընթացը
• Հրապարակել աշխատանքային հայտարարությունը

Ահա 10 հարթակներ, որոնք նախատեսված են աշխատանքային հայտարարությունների տեղադրման համար։

• www.staff.am
• www.careercenter.am
  
• www.jobfinder.am
• www.hr.am
  
• www.job.am
  
• www.jobs.am
  
• www.ijob.am
  
• www.jobspider.am
  

Աշխատակցի ընտրության գործընթացին առավել մանրամասն կարող եք ծանոթանալ այստեղ: