Ընկուզենու տակ հյուրատուն

Խալաթյանների ընտանիքն իրենց փոքրիկ ռեստորան-հյուրատանը «տեղավորել» է ամբողջ Վայոց ձորը. ավանդական ուտեստները, ավանդույթները, կենցաղն ու մշակույթը 25-ամյա Լիլիթն ու իր ընտանիքը ներկայացնում են տեղացի ու արտասահմանցի հյուրերին:

Ինչու՞ ընկուզենու տակ․ որովհետև ընտանեկան ռեստորանի ամառային տաղավարը գտնվում է հենց ընկուզենու տակ։ Հյուրատունը հենց այն տունն է, որտեղ բնակվում է նաև Խալաթյանների ընտանիքը, բիզնեսն էլ ընտանեկան է։ Հայրը՝ Աբրահամը, թոնրի աշխատանքների պատասխանատուն է։

Հյուրատան յուրաքանչյուր հյուրի համար կազմվում է հատուկ ճաշացանկ՝ ըստ նախասիրությունների։ Հյուրերը մասնակցում են նաև թոնրի գաթայի պատրաստման գործընթացին։

Դեռ 1994թվականին այստեղ Լիլիթի պապն ընդունել է արտասահմանցի հյուրերի, հյուրասիրել նրանց հայկական ավանդական ուտեստներ և ծանոթացրել լավաշի պատրաստման արարողությանը։ Դա եղել է ընտանեկան ջերմության և հյուրընկալության դրսևորում, իսկ Լիլիթը, ոգեշնչված այդ ավանդույթով, իրագործել է ընտանեկան բիզնեսի իր գաղափարը։ Հաշվի առնելով այն փաստը, որ մարզերում որակյալ հյուրատուն-ռեստորանները շատ քիչ են, առաջացել է գաղափար ստեղծել այնպիսի մի վայր, որտեղ այցելուները կզգան իրենց անմիջական և ջերմ միջավայրում և կհեռանան միայն դրական լիցքերով՝ կրկին վերադառնալու ակնկալիքով։

Երբ արդեն կար հյուրատնային բիզնեսի գաղափարը, Լիլիթը Լատվիայում մասնակցել է գյուղական տուրիզմի փորձի փոխանակման ծրագրի, որի փոքր դրամաշնորհով բակում ամառային տաղավարն է կառուցել և հենց առաջին տարում 1000-ից ավելի հյուր ընդունել։

Լիլիթին բիզնես գիտելիքների զարգացման գործում ձեռք մեկնեց Ակբա բանկը՝ սկսնակ ձեռներեցների համար իրականացվող դասընթացով:

«Դասընթացը մեզ համար մոտիվացիայի աղբյուր դարձավ, նաև՝ կայուն կազմակերպված աշխատանքի սկիզբ, օգնեց թիմային աշխատել: Գործունեության սկզբում սա կարևոր ձեռքբերում է: Երիտասարդ լինելով մի քիչ ամբիցիոզ ես լինում, իսկ դասընթացն օգնում է, որ բիզնեսն ու աշխատանքային պրոցեսը դիտարկեմ այլ կողմով և ավելի մտածված», - նշում է երիտասարդ գործարար Լիլիթը։

Առաջին քայլն արդեն արված է և հաջողված։