SWOT վերլուծություն

SWOT վերլուծությունը պարզ և շատ օգտակար մեթոդ է ընկերության ներքին և արտաքին խնդիրները պարզելու, ինչպես նաև մատնանշելու առկա հնարավորությունները՝ նպատակներին հասնելու ճանպարհին գոյություն ունեցող խոչընդոտները հաղթահարելուհարցում։

SWOT վերլուծության տարրերն են.

1. Ուժեղ և թույլ կողմերը, որոնք համարվում են կազմակերպության ներքին գործոնները և որոնք գտնվում են կազմակերպության վերահսկողության ներքո:

2. Հնարավորությունները և սպառնալիքները, որոնք վերաբերում են ընկերության բիզնես միջավայրին և որպես արտաքին գործոններ դուրս են ընկերության վերահսկողությունից:

Հաջողված SWOT վերլուծություն իրականացնելու համար պետք է իրականացնել հետևյալ քայլերը.

Քայլ 1: Սահմանե՛ք հստակ նպատակներ։ Որոշե՛ք թե ինչ եք ցանկանում բացահայտել վերլուծության արդյունքում:

Քայլ 2: Ստեղծե՛ք աղյուսակ, առանձնացրե՛ք կազմակերպության ուժեղ և թույլ կողմերը, հնարավորությունները և սպառնալիքները և լրացրե՛ք այդ ամենը աղյուսակում: Այս փուլում կարող եք ներգրավել կազմակերպության տարբեր աշխատակիցների ավելի լավ արդյունքի հասնելու համար: Հետևյալ հարցերի օգնությամբ կարող եք հեշտությամբ պարզել դրանք:

1. Ուժեղ կողմեր - Ձեր բիզնեսի ո՞ր հատկանիշներն ունեն առավելություններ մրցակիցների համեմատ:

• Ի՞նչն եք Դուք ավելի լավ անում քան Ձեր մրցակիցները:
• Ի՞նչ ռեսուրսներ ունեք Դուք, որոնք Ձեզ օգնում են մրցակիցներից առաջ անցնել (օրինակ՝ հմտություններ, առաջադեմ տեխնոլոգիաներ, թիմային ոգի և այլն)
• Որո՞նք են Ձեր ուժեղ կողմերը Ձեր մրցակիցների տեսանկյունից:

• Որո՞նք են ընկերության այն եզակի ակտիվները, որոնք Ձեզ առավելություն են տալիս:

2. Թույլ կողմեր - Ձեր բիզնեսի որ հատկանիշներն ունեն թերություններ մրցակիցների համեմատ:

• Ի՞նչն եք համարում Ձեր հիմնական խոչընդոտներ, որոնք թույլ չեն տալիս հասնել նպատակներին:
• Ի՞նչը կարող եք բարելավել Ձեր նպատակներին մեկ քայլով մոտենալու համար:
• Ուրիշների կարծիքով, որո՞նք են Ձեր թույլ կողմերը:
• Ի՞նչն է խոչընդոտում Ձեր վաճառքներին:
• Արդյո՞ք ընկերության անձնակազմը աշխատանքը բարելավելու համար մոտիվացիայի կարիք ունի:

3. Հնարավորություններ - Ո՞ր արտաքին գործոններն են դրական ազդեցություն ունենում կազմակերպության վրա:

• Արդյո՞ք Դուք տեղյակ եք շուկայի այն զարգացումների մասին, որոնք կարող եք օգտագործել Ձեր օգտին:
• Կա՞ն արդյոք օրենսդրական փոփոխություններ, որոնցից Ձեր բիզնեսը կարող է շահել:
• Կա՞ն արդյոք որոշակի միջոցառումներ, որոնք մեծ հնարավորություններ կընձեռեն:
• Կա՞ն արդյոք ոլորտներ, որտեղ Ձեր մրցակիցները խոցելի կլինեն

4. Սպառնալիքներ - Ո՞ր արտաքին գործոններն են բացասական ազդեցություն թողնում Ձեր բիզնեսի վրա:

• Հնարավո՞ր է արդյոք Ձեր մրցակիցների ուժեղ կողմերը Ձեր ընկերության համար լինեն ռիսկային:
• Կա՞ն արդյոք որոշակի տեխնոլոգիական կամ այլ փոփոխություններ, որոնք բացասաբար կազդեն Ձեր վաճառքների վրա:
• Արդյո՞ք Ձեր ընկերության թույլ կողմերից որևէ մեկը կարող է համարվել պոտենցիալ սպառնալիք:
• Արդյո՞ք շուկայում այլ մրցակիցներ են հայտնվել, ի՞նչն են նրանք այլ կերպ անում:
• Արդյո՞ք սեզոնայնությունը ազդում է Ձեր բիզնեսի վրա:

Քայլ 3: Երբ աղյուսակը պատրաստ է, վերլուծե՛ք և բացահայտե՛ք, թե որ կետերն են համարվում ավելի կարևոր Ձեր ընկերության համար:

Ուժեղ կողմեր - Մտածե՛ք այն մասին, թե ինչպես են Ձեր ուժեղ կողմերը օգնում հասնել Ձեր նպատակներին և ինչպես կարող եք պահպանել և ավելի արդյունավետ օգտագործել դրանք:

Թույլ կողմեր - Մտածե՛ք, թե որ թերություններն են առաջնահերթ լուծում պահանջում և որոշեք, թե երբ պետք է դրանք լուծվեն:

Հնարավորություններ - Որոշե՛ք, թե ինչպես կարող եք օգտվել հնարավորություններից՝ օգտագործելով Ձեր ուժեղ կողմերը: Որոշե՛ք, թե սկզբնապես որ հնարավորություններից եք ցանկանում օգտվել և սահմանե՛ք անհրաժեշտ ռեսուրսները:

Սպառնալիքներ - Մշակե՛ք ծրագիր, որով կարող եք հասկանալ, թե ինչպես նվազագույնի հասցնել, կառավարել կամ խուսափել այդ սպառնալիքների ազդեցությունից:

Քայլ 4: Մշակե՛ք ռազմավարություն հիմնվելով SWOT վերլուծության արդյունքների վրա: Համադրելով բոլոր 4 մասերի հիմնական գործոնները՝ կարող եք ստանալ 4 հիմնական սցենարային զարգացումներ՝ ռազմավարություններ: