Ձեր բիզնեսը զարգացնելու 4 ուղղություն

Հունվարի 13, 2021

էջանշում

Մեկնաբանություն

Եթե նախատեսում եք զարգացնել և ընդլայնել Ձեր բիզնես գործունեությունը նախ պետք է դիտարկեք ֆինանսական միջոցների հասանելիությունը:

Եթե արդեն գնահատել եք Ձեր ֆինանսական հնարավորությունները, կան շահույթը ավելացնելու մի քանի տարբերակներ`

ավելի շատ վաճառք իրականացնել Ձեր առկա հաճախորդներին,
ընդլայնել Ձեր վաճառքները՝ արտահանելով կամ օնլայն վաճառք իրականացնելով,
մշակել նոր ապրանքատեսակ կամ ծառայություն Ձեր առկա հաճախորդների համար,
մշակել նոր ապրանքատեսակ պոտենցիալ հաճախորդներին ներգրավելու համար:

Վերը նշվածներից յուրաքանչյուրը կարող է հարմար տարբերակ լինել Ձեզ համար, միայն անհրաժեշտ է կշռադատել յուրաքանչյուր տարբերակը և գնահատել իրականացման հնարավորությունները:

Վաճառել առկա հաճախորդներին

Ավելի շատ վաճառել Ձեր ներկա ապրանքատեսակներից առկա հաճախորդների բազային՝ շահույթն ավելացնելու ամենաքիչ ռիսկային տարբերակն է: Դա կարող է ներառել մշտական հաճախորդներին ներգրավելը և նրանց վաճառել ավելի շատ այն ապրանքատեսակից, որից նրանք պարբերաբար գնում են, կամ կապ հաստատել այն հաճախորդների հետ, ովքեր մեկ անգամ են գնում կատարել Ձեր ընկերությունից և առաջարկել նրանց կրկնել պատվերը:

Վաճառել նոր հաճախորդներին

Նոր հաճախորդներ ձեռք բերելու լավագույն միջոցը Ձեր բիզնեսը շուկային ներկայացնելն է և Ձեր ապրանքի կամ ծառայության շուկայում ավելի ճանաչելի դարձնելն է այն: Ձեր ապրանքանիշի առաջխաղացումը կարող եք անել մեծ կամ փոքր մասշտաբներով` կախված Ձեր բիզնեսի չափից և տեսակից։ Առաջխաղացում կարող եք անել օրինակ՝ հաճախորդների հետադարձ կապ տրամադրելու, գովազդների, առցանց արշավների կամ սոցիալական կայքերի միջոցով:

Զարգացնել առկա ապրանքատեսակները

Եթե ցանկանում եք զարգացնել Ձեր՝ գոյություն ունեցող ապրանքատեսակները և ներգրավել նոր հաճախորդներ, Դուք նախ պետք է առանձնացնեք Ձեր ապրանքի կամ ծառայության այն հատկանիշները, որոնք բարելավման կարիք ունեն: Խոսեք Ձեր ներկա հաճախորդների հետ՝ պարզելու համար, թե որոնք են Ձեր ապրանքի կամ ծառայության դրական և բացասական կողմերը, և ինչը նրանց կդրդի ապագայում ավելի շատ գնել Ձեր ապրանքը: Ձեր առկա հաճախորդները կտրամադրեն արժեքավոր տեղեկատվություն, որը կօգնի Ձեզ ապրանքները կամ ծառայությունները բարելավելու հարցում սակայն այդ ժամանակ, հավանաբար, կառաջանա գնի բարձրացման անհրաժեշտություն: Ավելի բարձր գնից առաջացած լրացուցիչ շահույթը կծածկի ապրանքի բարելավման վրա կատարված ծախսերը, և Ձեր ներդրումը արդյունավետ կլինի:

Մշակել նոր ապրանքատեսակներ

Ինչպես առկա ապրանքների դեպքում, այնպես էլ նոր ապրանք թողարկելու դեպքում անհրաժեշտ է առաջին հերթին հաշվի առնել հաճախորդների կարիքները: Եթե հասկանաք, թե ինչի կարիք ունեն հաճախորդները, կկարողանաք ստեղծել մի ապրանք, որը հաջողության կհասնի շուկայում: Պետք է նաև մտածեք, թե արդյո՞ք այդ ապրանքի համար շուկան արդեն իսկ բավական հագեցած չէ, քանի որ մեծ մրցակցությունն ավելի ռիսկային է:

Նոր ապրանք ստեղծելիս ավելի ճիշտ է թեստային ժամանակաշրջան սահմանել և ապրանքի նմուշը փորձարկել հաճախորդների հետ, պարզելու համար՝ ինչն է նրանց դուր գալիս, ինչը կցանկանային փոխել և ինչը կդրդի նրանց գնել այն:

Պլանավորել զարգացման ուղին

Երբ արդեն որոշել եք, թե որ ուղղությամբ եք պատրաստվում զարգացնել Ձեր բիզնեսը, անհրաժեշտ է նախապես պլանավորել և կատարել հետևյալ քայլերը.

Կազմե՛լ Ձեր ապրանքի կամ ծառայության մանրամասն նկարագիրը
Վերլուծե՛լ և բնութագրել այն շուկան, որտեղ պատրաստվում եք վաճառել Ձեր ապրանքը կամ ծառայությունը
Կազմե՛լ վաճառքների պլան՝ ներառյալ վաճառքների կանխատեսումներ
Կազմե՛լ մարքեթինգային պլան

Նոր շուկա մուտք գործելու դեպքում օգտագործեք շուկայում առաջատար կազմակերպությունների վերաբերյալ ուսումնասիրությունները նրանց չափի, աճի միտումների և հնարավորությունների վերաբերյալ:

Ձեռնարկությունները հաճախ թերագնահատում են նոր շուկա մուտք գործելու կամ նոր ապրանքատեսակ թողարկելու համար անհրաժեշտ ֆինանսական միջոցների չափը: Այդ պատճառով պետք է հաշվի առնել բոլոր այն ծախսերը, որոնք կարող են առաջանալ այդ գործընթացում և կատարել դրամական հոսքերի կանխատեսում:

Տարածել հոդվածը