Նպատակների սահմանում Ձեր բիզնեսի հաջողության համար

Մարդկանց մեծամասնությունը համոզված է, որ նպատակների սահմանումը էական նշանակություն ունի հաջողության հասնելու գործում, սակայն նրանց միայն 5%-ն է թղթին հանձնում իր նպատակները կամ գործողություններ իրականացնում դրանց հասնելու համար: Մարդիկ իրենց նպատակները գրառելու սովորություն չունեն, քանի որ վախենում են պատասխանատվություն կրելուց: Հիշեք, որ նպատակները ցանկացած ժամանակ կարող են փոփոխվել, սակայն ցանկացած նպատակի իրականացման համար պետք է քայլեր ձեռնարկել: Երբ Դուք սահմանեք և հասնեք Ձեր նպատակներին, դա Ձեզ ուժ կտա առաջ շարժվել և սահմանել նոր նպատակներ:

Ստորև ներկայացված խորհուրդները կօգնեն Ձեզ նպատակների սահմանման գործընթացում:

Սահմանեք կարճաժամկետ և երկարաժամկետ նպատակներ:

Դուք կարող եք սահմանել շաբաթական, կիսամյակային, տարեկան և նույնիսկ եռամյա կամ հնգամյա նպատակներ: Կարճաժամկետ նպատակների սահմանման համար առաջին հերթին անհրաժեշտ է սահմանել երկարաժամկետ նպատակները: Արդյո՞ք գոյություն ունի եկամտի կամ հաճախորդների սահմանված քանակ, որին ցանկանում եք հասնել որոշակի ժամանակահատվածի ընթացքում: Օրինակ, եթե Ձեր նպատակն է ունենալ տարեկան 10.000.000 դրամ եկամուտ, ապա պետք է կազմել պլան, որտեղ արտացոլված կլինեն այն բոլոր գործողությունները, որոնք տանում են Ձեր նպատակին: Եթե դժվարանում եք կազմել այդ պլանը, ապա կարող եք դիմել մասնագետների, ընկերների կամ հարազատների օգնությանը: Պլանը կազմելուց հետո բաժանեք նշված գործողությունները փոքր քայլերի և սկսեք գործել:

Սահմանե՛ք վերջնաժամկետ Ձեր նպատակների համար:

«Մեծացնել վաճառքի ծավալները». սա իհարկե լավ նպատակ է, սակայն անորոշ է և հաջողությունը գնահատելու հնարավորություն չի ընձեռում: Փոփոխեք Ձեր նպատակները՝ դարձնելով դրանք կոնկրետ և չափելի: Բոլոր նպատակները պետք է լինեն հստակ (ներգրավել նոր հաճախորդներ), չափելի (ներգրավել երեք նոր հաճախորդ) և ունենան ժամանակային սահմանափակումներ (ներգրավել երեք նոր հաճախորդ մինչև նոյեմբեր ամսվա ավարտը):

Մի՛ սահմանեք անհասանելի նպատակներ:

Համոզվա՛ծ եղեք, որ Ձեր նպատակները հասանելի են: Անհասանելի կետին հասնելու ձգտում ունենալու դեպքում համոզվա՛ծ եղեք Ձեր պարտության հարցում:

Մի՛ ծուլացեք:

Որոշ ձեռներեցներ մտադրված այնպիսի նպատակներ են սահմանում, որոնց հասնելը առանձնահատուկ ջանքեր չի պահանջում: Եթե Դուք նույնպես հեշտ նպատակներ եք սահմանում, ապա մարտահրավեր նետեք ինքներդ Ձեզ: Օրինակ, յուրաքանչյուր ամիս մեկ նոր հաճախորդ ներգրավելու փոխարեն երկու կամ երեք հաճախորդ ներգրավելու նպատակ սահմանեք:

Եղե՛ք ակտուալ:

Ձեր բոլոր քայլերը, որոնք Ձեր առավել կարճաժամկետ նպատակներն են, պետք է օգնեն Ձեզ հասնելու կոնկրետ մեկ նպատակի: Ուշադրությու՛ն դարձրեք այն նպատակներին, որոնք պարզապես զբաղեցնում են Ձեզ, և Ձեր բիզնեսին հաջողություն չեն խոստանում: Դուք անհրաժեշտ ջանքեր չեք գործադրի Ձեր առջև դրված նպատակներին հասնելու համար, եթե կարծում եք, որ Ձեր նպատակները իմաստ չունեն:

Եղե՛ք համբերատար և հետևողական:

Եթե նպատակների սահմանման Ձեր համակարգը թվում է, թե չի աշխատում, որովհետև Դուք սահմանված ժամկետներում չեք կատարում այն ամենը ինչ գրում եք, ապա պետք չէ հիասթափվել և հանձնվել: Շարունակեք գրառել նպատակները առաջիկա ամիսների համար և կնկատեք՝ ինչպես է աստիճանաբար բարելավվում նպատակների սահմանման Ձեր հմտությունները:

Անդադար վերանայե՛ք Ձեր նպատակները:

Ձեր կարճաժամկետ նպատակների պլանը դրեք տեսանելի վայրում, օրինակ՝ աշխատասեղանին, համակարգչի կողքը կամ համակարգչի էկրանին, որպեսզի իմանաք, թե ինչ քայլեր է անհրաժեշտ ձեռնարկել դրանց հասնելու համար: Ամեն ամիս վերանայեք տարեկան նպատակները, ստուգելու համար՝ արդյոք ճիշտ ուղու վրա եք, թե՝ ոչ: Եթե Ձեր բիզնեսը կենտրոնացել է այլ բանի վրա, երբեք մի՛ վախեցեք փոփոխել Ձեր նպատակները, քանի որ ճկունությունը նպատակների սահմանման ամենագլխավոր բաղադրիչն է հանդիսանում: