Արտահանման մասին որոշում

Մուտքը միջազգային շուկա հնարավոր է ապրանքի կամ ծառայության արտահանման միջոցով: Արտահանումը կարող է խթանել շրջանառությունը և նորամուծություններ կատարելու անհրաժեշտություն ստեղծել` ապրանքը նոր շուկայի կարիքներին համապատասխանեցնելու համար: Այն նաև նվազեցնում է միայն մեկ շուկայում գործելու ռիսկերը, քանի որ տեղաբաշխելով վաճառքները տարբեր երկրներում՝ Դուք ապահովագրում եք Ձեզ տարբեր տնտեսությունների անկումների և վերելքների արդյունքում առաջացող անկայունությունից:

Ձեր ապրանքը կամ ծառայությունը արտահանելու որոշում կայացնելուց առաջ պե՛տք է․

1. Որոշել արտահանման շուկան

Եթե արդեն արտահանելու որոշում եք կայացրել, ապա պետք է ընտրեք այն շուկան, ուր ցանկանում եք արտահանել Ձեր ապրանքը կամ ծառայությունը: Շատերն արտահանման երկիրը ընտրելիս դիտարկում են միայն զարգացած երկրները, որտեղ շուկան բավականին մեծ է, և սպառողների եկամուտները բավականին բարձր են, մինչդեռ արտահանվող երկիրը ընտրելիս անհրաժեշտ է նաև հաշվի առնել՝

• տվյալ երկրի կլիմայական պայմանները, աշխարհագրական դիրքը, աշխատուժի կրթվածության և ենթակառուցվածքների զարգացվածության մակարդակը
• երկրի ներքին պահանջարկի կառուցվածքը, որակական հատկանիշները, չափը և զարգացման հեռանկարները
• երկրի ներքին շուկայի մրցակցությունը, մրցակիցների թիվը և նրանց առավելությունները Ձեր նկատմամբ, մրցակիցների և հաճախորդների միջև փոխհարաբերությունները
• չնախատեսված դեպքերը, ինչպես օրինակ՝ գործադուլները, պատերազմները, արագ զարգացող նորարարությունները, տարադրամի տատանումները

2. Կատարել շուկայի ուսումնասիրություն

Շուկայի ուսումնասիրությունն անհրաժեշտ է հնարավոր ռիսկերը նվազեցնելու և հաջողության հասնելու հավանականությունը բարձրացնելու համար:

Շուկայի ուսումնասիրություն կատարելիս և թիրախային շուկան ընտրելիս ուշադրություն դարձրեք հետևյալ կետերին.

• Որքա՞ն է Ձեր կողմից ընտրված շուկայի չափը և տվյալ ապրանքի կամ ծառայության պահանջարկը շուկայում:
• Ինչպե՞ս կարող են թիրախային շուկայի կրոնական կամ մշակութային հայացքները և սովորույթներն ազդել ապրանքի պահանջարկի կամ սպառման վրա:
• Հաշվի՛ առեք շուկայի ժողովրդագրական տվյալները (բնակչությունը երիտասա՞րդ է թե՞ ծերացող):
• Ինչպիսի՞ն է շուկայի աշխարհագրական կառուցվածքը: Կա՞ն արդյոք հատուկ քաղաքներ/մարզեր, որոնց վրա պետք է կենտրոնացնեք Ձեր ուշադրությունը: Հավանաբար, Դուք չեք սկսի արտահանել միանգամից մեծ երկրների բոլոր քաղաքներ:
• Որքանո՞վ է հեշտ մուտք գործել տվյալ շուկա: Կա՞ն արդյոք յուրահատուկ խոչընդոտներ, որոնց հնարավոր է հանդիպեք արտահանելիս:
• Ո՞վքեր են հիմնական մրցակիցները: Կարո՞ղ է արդյոք Ձեր ապրանքը կամ ծառայությունը մրցել տեղական ապրանքների կամ ծառայությունների հետ։