Ավտոմատացման կիրառումը բիզնես գործընթացներում

Բիզնես գործընթացների ավտոմատացման կարևորությունը հատկապես ընդգծվեց ERP (Enterprise Resource Planning) համակարգերի զարգացման շնորհիվ դեռևս 1960-ական թվականներին։ Այդ ժամանակներից ի վեր բիզնեսները հասկացան, որ ավտոմատացումը ոչ միայն բարձրացնում է արդյունավետությունը, այլև նվազեցնում է ծախսերը։

Բիզնեսի ավտոմատացումը տալիս է մի շարք առավելություններ.

Արդյունավետության բարձրացում

Ըստ վիճակագրության՝ ՏՏ ընկերությունների 71%-ը կարծում է, որ բիզնեսի ավտոմատացումը խնայում է ժամանակի 50%-ը։ Ավտոմատացման գործիքներն օգնում են կատարել այնպիսի առաջադրանքներ, որոնք հաճախ մեխանիկական բնույթ են կրում և խլում մեծ ժամանակ։ Փոխարենը՝ աշխատակիցները կենտրոնանանում են բիզնեսի ռազմավարությանն ավելի անմիջականորեն առնչվող գործառույթների վրա։ Այսպիսի գործիքների շարքին են դասվում օրինակ էլ․ նամակներ ուղարկելու ավտոմատացման գործիքները։

Տվյալների արդյունավետ կառավարում

Տվյալահեն որոշումների կայացումը յուրաքանչյուր բիզնեսի զարգացման գլխավոր նախապայմաններից է։ Ավտոմատացման գործիքների շնորհիվ հնարավոր է իրական ժամանակում հետևել գրանցված արդյունքներին և տվյալներին։ Մինչդեռ ձեռքով կատարված աշխատանքը չի տալիս այս հնարավորությունը, և առաջանում է տվյալների հավաքագրման անհրաժեշտություն, ինչն էլ կրկին ժամանակի կորուստ է։

Մրցակցային առավելության հնարավորություն

Ավտոմատացված գործընթացների շնորհիվ Ձեր բիզնեսն ավելի արագ է կարողանում արձագանքել շուկայի փոփոխություններին։ Այս պարագայում ավտոմատացման լավագույն օրինակներից է առաքմամբ և փոխադրումներով զբաղվող ընկերությունների կողմից գործընթացների ավտոմատացումը։ Մի շարք ավտոմատացման համակարգերի շնորհիվ նման ընկերություններն ավելի արագ են կարողանում կազմակերպել առաքումները, ինչն էլ նրանց մրցակցային է դարձնում։

Ճշգրտության պահպանում

Մի շարք ոլորտներում, ինչպիսին են հաշվապահությունը, ֆինանսները, առողջապահությունը և այլն, ճշգրիտ և անսխալ աշխատանքն ամենամեծ առաջնահերթությունն է։ Այս պարագայում ավտոմատացումը նվազագույնի է հասցնում սխալվելու հավանականությունը, միաժամանակ արագացնում աշխատանքը՝ խնայելով ժամանակ։

Սպասարկման որակի բարելավում

Բիզնեսի աճին զուգահեռ՝ նույն տեմպով ավելի շատ հաճախորդների սպասարկելը դառնում է հիմնախնդիր։ Այստեղ ևս ավտոմատացված գործիքներն օգնում են հաճախորդների կարիքներին ավելի արագ արձագանքելու հարցում։ Օրինակ, չաթբոտ համակարգերը հնարավորություն են տալիս մշտապես և վայրկենական պատասխանել հաճախորդների հարցերին և տրամադրել աջակցություն։

Ծախսերի կրճատում

Ավտոմատացումը նվազեցնում է աշխատուժի ծախսերը և ժամանակատար գործողությունները: 

Այս բոլոր առավելություններով հանդերձ՝ բիզնեսի ավտոմատացումն իրենից ենթադրում է մի շարք մարտահրավերներ, որոնց հարկավոր է պատրաստ լինել մինչև որոշումների կայացումը։ Դրանք են՝

• Սկզբնական մեծ ներդրումները բիզնեսի համար։ Այդ պատճառով հարկավոր է հաշվի առնել ներդրումների վերադարձը (ROI), քանի որ ավտոմատացման համակարգերը միշտ չէ, որ մատչելի են։
• Աշխատակիցների պատրաստվածության աստիճանը։ Սահուն անցումն ավտոմատացմանը գրեթե անհնար է։ Թեև ավոտամատացման գործիքները կիրառվում են ձեռքով աշխատանքը նվազեցնելու համար, դրանք այնուամենայնիվ գործի են դրվում հենց աշխատակիցների կողմից, ինչն էլ պահանջում է համապատասխան հմտություններ։ Այդ իսկ պատճառով երբեմն անհրաժեշտություն է առաջանում անցկացնել դասընթացներ և զինել աշխատակիցներին նոր հմտություններով։

Ավտոմատացումը թույլ է տալիս բիզնեսին ոչ միայն աշխատել ավելի արդյունավետ, այլև ավելի խելացի: Այն խթանում է արտադրողականությունը, նվազեցնում ծախսերը և բարելավում հաճախորդների ու աշխատակիցների փոխհարաբերությունները՝ ի վերջո դառնալով բիզնեսի հաջողության կարևոր գործիք։

Կայք՝ uteach.io

Էլ. հասցե՝ support@uteach.io

Հեռ.՝ +374 55 85 55 88