Քաղաքացիական պատասխանատվությունն ապահովագրելու անհրաժեշտություն

Գործունեություն ծավալելիս ցանկացած ընկերություն կրում է չկանխատեսված հանգամանքների և պատահարների տեղի ունենալու ռիսկը, որոնց հետևանքով կարող է տուժել երրորդ անձանց գույքը, կյանքը կամ առողջությունը:

Համաձայն ՀՀ Քաղաքացիական օրենսգրքի՝ քաղաքացու անձին (առողջությանը կամ կյանքին) և քաղաքացու կամ իրավաբանական անձի գույքին վնաս պատճառած անձը պարտավոր է հատուցել պատճառված վնասը ողջ ծավալով:

Գործնականում քիչ չեն դեպքերը, երբ ջրի չնչին արտահոսքը վերածվում է ահռելի ծախսերի՝ կապված վնասված տարածքների վերանորոգման, ջրից վնասված սարքավորումները և կահույքը նորով փոխարինելու հետ: Հրդեհը նույնպես կարող է հսկայական ծախսերի պատճառ հանդիսանալ՝ կապված այլ անձանց գույքի արժեքի հատուցման, ինչպես նաև տուժածների կյանքին կամ առողջությանը պատճառված վնասների հատուցման հետ:

Ցավոք, իրադարձությունները, որոնք կարող են հանգեցնել կյանքին կամ գույքին վնաս պատճառելուն, սահմանափակված չեն միայն հրդեհով կամ ջրի արտահոսքով, և քաղաքացիական պատասխանատվության ապահովագրությունը պարզապես անհրաժեշտություն է ցանկացած ժամանակակից ընկերության համար` հաշվի առնելով ռիսկերի բազմազանությունը:

Հուսալի ապահովագրություն գործունեության տարբեր տեսակների համար

Պատասխանատվության ապահովագրությունը կարող է ձեռք բերվել, օրինակ, հետևյալ տեսակների գործունեություն իրականացնելու դեպքում՝

• անշարժ գույքի օբյեկտների կառավարում, տիրապետում, շահագործում ինչպես անձնական, այնպես էլ վարձակալության հանձնման նպատակով,
• վարձակալված տարածքների շահագործում
• բազմաբնակարան բնակելի շենքերի կառավարում
• մեքենաների տեխնիկական սպասարկման ծառայությունների մատուցում, գործարքառուի (ավտոդիլերի) գործունեություն
• հասարակական սննդի մատակարարում
• հյուրանոցների գործունեություն
• հասարակական միջոցառումների կազմակերպում և իրականացում (ցուցահանդեսներ, համերգներ և այլն)
• ապրանքների, աշխատանքների, ծառայությունների արտադրություն և իրացում
• պահնորդային ծառայություններ
• ֆիթնես կենտրոնների, սպորտային համալիրների և լողավազանային համալիրների ծառայություններ

Գործունեության տեսակները չեն սահմանափակվում վերը նշված ցուցակով: Հայտնեք ապահովագրական ընկերության մասնագետին Ձեր ծավալած գործունեության մասին, և Ձեզ կառաջարկվի հենց Ձեր բիզնեսի համար ապահովագրության ամենաօպտիմալ տարբերակը:

Ապահովագրական ծածկույթի ծավալը

Պատասխանատվության ապահովագրության պայմանագրով ստանդարտ ծածկույթը ներառում է պատասխանատվություն՝

• երրորդ անձանց գույքին պատճառված վնասի համար
• երրորդ անձանց կյանքին կամ առողջությանը պատճառված վնասի համար

Լրացուցիչ կարող են ապահովագրվել՝

• դատական և իրավաբանական խորհրդատվության համար ծախսերի առաջացման ռիսկերը
• շրջակա միջավայրին վնաս պատճառելու ռիսկերը

Կախված ձեռնարկատիրության գործունեության առանձնահատկություններից` ապահովագրողը կառաջարկի առավել օպտիմալ ապահովագրական ծածկույթ:

Որքա՞ն արժե ապահովագրությունը

Ապահովագրության արժեքը կախված է մի շարք գործոններից՝

• գործունեության տեսակից և առանձնահատկություններից
• գործունեության ծավալից
• պահանջվող ապահովագրական գումարից (հատուցման առավելագույն սահմանաչափից),
• գործունեության իրականացման տարածքից, օբյեկտի առանձնահատկություններից,
• ապահովագրության ժամկետից
• այլ գործոններից:

Պայմանագիր կնքելու համար ներկայացվող փաստաթղթերի ցանկը

Պայմանագիր կնքելու համար անհրաժեշտ է դիմել Ապահովագրական ընկերությանը, լրացնել ընկերության կողմից տրամադրված հարցաթերթիկը: Ապահովագրության ընկերության աշխատակիցը կտրամադրի անհրաժեշտ փաստաթղթերի ցանկը, որը կարող է տարբեր լինել պատասխանատվության ապահովագրության տարբեր պայմանագրերի դեպքում:

Գործողություններ պատահարի դեպքում

• անհապաղ հայտնել տեղի ունեցած իրադարձության մասին ապահովագրական ընկերությանը` զանգահարելով պայմանագրում նշված հեռախոսահամարով և հետևել աշխատակցի հրահանգներին
• ձեռնարկել միջոցներ հնարավոր վնասը նվազեցնելու համար
• չընդունել մեղք առանց ապահովագրական ընկերության ներկայացուցչի հետ խորհրդակցելու

Ապահովագրական հատուցում ստանալու համար ներկայացվող փաստաթղթերի ցանկը

Ապահովագրական հատուցում ստանալու համար անհրաժեշտ փաստաթղթերի ցանկը կախված է տեղի ունեցած իրադարձության բնույթից, ապահովագրված պատասխանատվության տեսակից, պայմանագրի պայմաններից: