Անձնական ֆինանսներ: Ֆինանսական դրսևորումներ

Հետաձգողներ

Նրանք հաճախ կազմակերպչական հմտությունների բացակայության պատճառով անտեսում են հաշիվների վճարումները և այլ ֆինանսական առաջադրանքների կատարումը, որը կարող է ձեռնարկությանը բերել ֆինանսական դժվարությունների: Ֆինանսական հարցերի հանդեպ անուշադրությունը առնվազն կարող է հանգեցնել ուշացման համար հավելյալ վճարների և տուգանքների գանձման: Երբ նմանատիպ ուշացումները պարբերական բնույթ են կրում, տուժում է Ձեր վարկային պատմությունը:

Փորձե՛ք բոլոր փաստաթղթային գործերից առանձնացնել ֆինանսական հաշիվներն ու հաշվետվությունները: Կարող եք հաշվետու ժամանակաշրջանի բոլոր փաստաթղթերի համար ունենալ ֆինանսական թղթապանակ: Յուրաքանչյուր ամիս սահմանեք օրեր տվյալ թղթապանակը ուսումնասիրելու և վճարումները կատարելու համար: Ստանալով հաշիվները՝ անմիջապես ծրարի վրա կարող եք գրառել յուրաքանչյուրի վերջնաժամկետը, որպեսզի ժամանակին կատարեք վճարումները:

Համոզվելու համար, որ բոլոր վճարումները կատարվում են ժամանակին, կարող եք սահմանել հաշիվների ավտոմատ վճարման համակարգ: Ձեր ընթացիկ հաշվին բավարար գումար թողնելու դեպքում ավտոմատ վճարումները կկատարվեն ժամանակին:

Շատ ծախսողներ

Նրանք սիրում են ծախսել մեծ գումարներ և հաճախ այնպիսի իրեր են գնում, որոնց կարիքը իրականում չունեն: Եթե Դուք հաճախ եք բանկից կանխիկացնում ամբողջ գումարը և ծախսում մինչև օրվա ավարտը կամ անհնար եք համարում խանութից դուրս գալը առանց գնումներ կատարելու, ապա ամենայն հավանականությամբ Դուք այս խմբին եք պատկանում: Շատ ծախսողները իրապես չեն գիտակցում իրենց ընդհանուր պարտավորությունների քանակը: Նրանցից շատերը կարծում են, որ ավելի քիչ պարտավորություններ ունեն, քան իրականում կան: Շատ ծախսողները կարող են վերահսկել ծախսերը՝ սահմանափակելով քարտից վճարման սահմանաչափը:

Խորհուրդների հիման վրա խոշոր ներդրումներ կատարողներ

Նրանք հսկայական ներդրումներ կատարելու որոշումներ են կայացնում՝ հիմնվելով ընկերների, բարեկամների, հարազատների, գործընկերների և ծանոթների խորհուրդների վրա: Նրանց վրա անգամ կարող է ազդել ամսագրերում արագ վաճառվող բաժնետոմսերի գովազդը:

Այս վարքագծի տեր անձինք փաստերի վրա հիմնվելու փոխարեն առաջնորդվում են զգացմունքներով: Ոչ խելամիտ որոշումները հաճախ կայացվում են, երբ ներդրումները երկարաժամկետ ռազմավարության մեջ նախապես ներառված չեն: Նրանք, ովքեր ֆինանսական կրթության կամ ներդրումային փորձի պակաս ունեն, կարող են դիմել ֆինանսական խորհրդատուների օգնությանը:

Հավերժ լավատեսներ

Այս վարքագծի տեր անձինք սովոր չեն մտածել տհաճ իրադարձությունների մասին: Այդ իսկ պատճառով՝ նման մարդիկ չեն ունենում բժշկական կամ կյանքի ապահովագրություն:

Փորձը ցույց է տալիս, որ կյանքի անսպասելի իրադարձությունները հանգեցնում են անսպասելի ծախսերի: Նմանատիպ իրադարձությունների օրինակ կարող են լինել բնակարանի վերանորոգման, երկրից շտապ մեկնելու կամ գողացված մեքենան նորով փոխարինելու անհրաժեշտությունը: Նշված խնդիրների լուծումը կարող է ավելի բարդանալ ապահովագրության բացակայության դեպքում: Ավելի ապահով է պատրաստ լինել կյանքի անսպասելի անակնկալներին: Մարդկանց մեծամասնությունը բողոքում է, որ վճարում է ապահովագրության դիմաց և երբեք չի օգտագործում, սակայն պետք է մտածել, որ հաջողակ եք, եթե երբևէ այն օգտագործելու կարիք չի առաջացել:

Եղե´ք նախաձեռնող, կատարե´ք անհրաժեշտ փոփոխություններ և առա´ջ շարժվեք այն ուղիով, որը ֆինանսական հաջողություն է խոստանում: