Ինֆլուենսեր մարքեթինգ. ինչպես ընտրել ճիշտ գործընկեր

Թվային դարաշրջանում բիզնեսները մշտապես որոնում են նորարարական եղանակներ՝ իրենց թիրախային լսարանին հասնելու և բրենդի ճանաչելիությունը բարձրացնելու համար։ Ինֆլուենսեր մարքեթինգը ամենաարդյունավետ ժամանակակից մարքեթինգային ռազմավարություններից է։ Սոցիալական մեդիայի զարգացման շնորհիվ ինֆլուենսերները դարձել են ազդեցիկ կերպարներ, որոնք մեծ ազդեցություն են ունենում սպառողների որոշումների վրա։ Եկեք հասկանանք՝ ինչպե՞ս է ինֆլուենսեր մարքեթինգը օգնում բիզնեսներին, և ինչպե՞ս ընտրել ճիշտ ինֆլուենսեր՝ վաճառքների ավելացման կամ բրենդի մասին իրազեկվածության մակարդակը բարձրացնելու համար։

Ինֆլուենսեր մարքեթինգը կարծիքի առաջնորդների հետ համագործակցության պրոցես է, որը ենթադրում է հայտնի անձանց, փորձագետների և այլ ազդեցիկ դեմքերի միջոցով բրենդի առաջխաղացում: Նրանք ներկայացնում են ապրանքները կամ ծառայությունները ոչ թե սովորական գովազդի միջոցով, այլ որպես ընկերական ու վստահելի առաջարկ: Մարդիկ հակված են վստահելու նրան, ում ճանաչում են։ Այսպիսի գովազդը նման է բանավոր խոսքի, երբ մեկը մյուսին խորհուրդ է տալիս որևէ ծառայություն կամ ապրանք։

Բացի այդ, ինֆլուենսերները կարող են հեղինակություն լինել իրենց լսարանի համար, եթե նրանք մասնագետներ են որևիցե ոլորտում: Օրինակ, եթե ինտերիեր դիզայները իր լսարանին պատմի ոլորտին վերաբերող բրենդի մասին, ապա նրա առաջարկությունն ավելի հզոր և արդյունավետ կլինի, քան հայտնի բժշկի արված առաջարկությունը։ Իսկ ոճաբանը կարող է ավելի արդյունավետ գովազդել հագուստի բրենդը:

Ինֆլուենսերների տեսակները.

• Միկրոինֆլուենսերներ (մինչև 100,000 հետևորդ) - ավելի մատչելի և վստահելի տարբերակ՝ փոքր բյուջե ունեցող բիզնեսների համար։ Այս տեսակի ինֆլուենսերներն ունեն փոքր, բայց հավատարիմ լսարան, ինչը ապահովում է վստահության և ներգրավվածության բարձր մակարդակ։ Ավելի մատչելի լինելը բիզնեսներին հնարավորություն է տալիս գովազդ պատվիրել մի քանի միկրոինֆլյուենսերների մոտ, քան դիմել մեգաինֆլուենսերներին՝ առավել պասիվ լսարանով։
• Մակրոինֆլուենսերներ (100.000-1.000.000 հետևորդ) - ունեն մեծ տեսանելիություն, սակայն ավելի բարձր արժեք։ Մակրոինֆլուենսերները հաճախ համագործակցում են խոշոր բրենդների հետ, ինչը ստեղծում է վստահություն։
• Մեգաինֆլուենսերներ (1.000.000+ հետևորդ) - առավել թանկ տարբերակ, հարմար՝ խոշոր բրենդների համար։ Մեգաինֆլուենսերները արդյունավետ են բրենդի իրազեկման արշավների համար, քանի որ նրանք ունեն մեծ լսարան։

Ձեր բրենդին համապատասխան ինֆլուենսեր ընտրելու համար, ով հնարավորինս լավ կներկայացնի Ձեր բրենդը կամ արտադրանքը, պետք է հաշվի առնել մի քանի կարևոր կետեր.

1. Սահմանեք Ձեր նպատակը

Մինչև ինֆլուենսերի հետ համագործակցելը, հստակեցրեք Ձեր բիզնեսի մարքեթինգային նպատակները։ Արդյո՞ք ցանկանում եք մեծացնել բրենդի ճանաչելիությունը, ներգրավել նոր հաճախորդներ, թե՞ խթանել վաճառքները։ Հստակ սահմանեք՝ ինչ արդյունքներ եք ուզում գրանցել ինֆլուենսերի հետ համագործակցությամբ։

2. Հետևորդների քանակ և ակտիվություն

Համոզվեք, որ ինֆլուենսերի հետևորդները առավելագույնս համընկնում են Ձեր թիրախային լսարանի հետ։ Ինֆլուենսերի հետևորդների քանակը կարևոր է, բայց պետք չէ ընտրություն կատարել միայն հետևորդների քանակից ելնելով։ Հետևորդների ակտիվությունն ու ներգրավվածությունն ավելի կարևոր են։ Օրինակ, ինֆլուենսերը, ով ունի մեծ քանակի հետևորդներ, սակայն նրանց ներգրավվածությունը հրապարակումներում և հոլովակներում քիչ է, կարող է լինել պակաս արդյունավետ։ Ներկայումս, միկրոինֆլուենսերներն առավել արդյունավետ են համագործակցության տեսանկյունից, քանի որ, թեև նրանց լսարանը փոքր է, սակայն, նրանք իրենց հետևորդների շրջանում առավել վստահելի են։

3. Հավատարմություն և հեղինակություն

Ընտրեք ինֆլուենսեր, ով ունի բարձր հեղինակություն ու վստահություն իր հետևորդների մոտ։ Միայն այն դեպքում, երբ ինֆլուենսերը անկեղծ է՝ նրա առաջարկությունները կընդունվեն որպես օբյեկտիվ և վստահելի։ Շատ կարևոր է ստուգել, թե ինչպիսի հաղորդագրություններ է տարածել ինֆլուենսերը նախկինում, արդյոք նրա բովանդակությունը համահունչ է Ձեր բրենդի արժեքներին։ Խուսափեք այնպիսի ինֆլուենսերներից, ովքեր օգտագործում են խաբուսիկ մեթոդներ, ինչպիսիք են արհեստական հետևորդների գնումը կամ չափազանց շատ հովանավորվող բովանդակությունը։

4. Հաղորդակցման որակը

Հաջորդ կարևորագույն գործոնը ինֆլուենսերի հաղորդակցման ոճն է։ Ինֆլուենսերը պետք է կարողանա հուզիչ և կրեատիվ ձևով ներկայացնել Ձեր բրենդը։ Ընտրեք այնպիսի գործընկեր, ով լավ է շփվում իր հետևորդների հետ, հետաքրքիր ու բարձրորակ բովանդակություն է ստեղծում։

5. Բյուջե

Ինֆլուենսերների հետ համագործակցությունը մեծ կապ ունի նախատեսված մարքեթինգային բյուջեի հետ։ Նախքան գործընկեր ընտրելը՝ պետք է պարզել, թե որ ինֆլուենսերն են համապատասխանում Ձեր ֆինանսական հնարավորություններին, ինչը կօգնի հասնել ավելի նպատակաուղղված ու արդյունավետ համագործակցության։

6. Ակնկալիքների հստակեցում

Կայուն և արդյունավետ համագործակցության համար կարևոր է հստակեցնել, թե ինչ արդյունքներ եք ակնկալում։ Անհրաժեշտ է քննարկել, թե ինֆլուենսերը ինչպես պետք է ներկայացնի Ձեր ապրանքը՝ տեսանյութեր, լուսանկարներ, բլոգային գրառումներ, նաև թե որքան հաճախ նա պետք է խոսի այդ մասին։

Ինֆլուենսեր մարքեթինգը կարող է լինել գերազանց գործիք Ձեր բրենդի զարգացումը խթանելու և սպառողների հետ վստահելի հարաբերություններ կառուցելու համար։ Հաջողության հասնելու համար կարևոր է ընտրել այնպիսի ինֆլուենսերներ, որոնք համապատասխանում են Ձեր բրենդի արժեքներին և թիրախային լսարանին։

Կայք՝ brandon.am

Էլ. հասցե՝ info@brandon.am

Հեռ.՝ +374 77 870 090