Մերչնդայզինգ. ինչպես են ընկերությունները դրդում հաճախորդներին ավելի շատ գնումներ անելուն

Մերչնդայզինգը վաճառքի խթանման պրոցես է, որը ներառում է ապրանքների ներկայացման, փաթեթավորման, դասավորության և պրոմո-ակցիաների համակարգված ծրագիր՝ նպատակ ունենալով խթանել հաճախորդների գնման որոշումը։ Այն գործունեություն է, որն օգնում է ռացիոնալ օգտագործել խանութ-սրահի յուրաքանչյուր քառակուսի մետրը, արդյունավետ կերպով ցուցադրել ապրանքները հաճախորդներին և դրդել նրանց գնումներ կատարել։

Այս ամենը ստորադասվում է մեկ նպատակի՝ վաճառքի ծավալների ավելացման։ Այս հոդվածում մենք կխոսենք մերչնդայզինգի գործիքների մասին, որոնք Դուք կարող եք օգտագործել Ձեր խանութում և դրանով իսկ ազդել վաճառքի աճի վրա:

Ինչպե՞ս է աշխատում մերչնդայզինգը

Խաչաձև

Ապրանքների մեկ կատեգորիան առաջարկվում է հարակից ապրանքների հետ, որպեսզի գնորդը տեսնի և գնի դրանք «միաժամանակ», նույնիսկ, եթե ի սկզբանե դրա մտադրությունը չի եղել: Օրինակ, հացը և կաթնամթերքը տեղադրված են խանութի ամենավերջում՝ իրարից շատ հեռու: Դրանք գնելու համար գնորդն անցնում է տարբեր ապրանքների կողքով, որոնց գայթակղությանը շատ հաճախ չի դիմանում։

Զգայական

Նման մերչնդայզինգի նպատակը հաճելի մթնոլորտ ստեղծելն է՝ զգայարանների վրա ազդելով։ Մեծ ուշադրություն է դարձվում լուսավորությանը, գնորդների համար հիմնական ապրանքների առանձնացմանը և երաժշտությանը։ Դանդաղ, հաճելի երաժշտությունը կարող է դրդել հաճախորդներին ավելի երկար մնալ խանութում, իսկ հատուկ ընտրված բույրերը՝ մեծացնել նրանց հետաքրքրությունը ապրանքների նկատմամբ։ Օրինակ, սուրճի բույրը գրավում է հաճախորդներին սրճարաններում, իսկ թարմ հացի հոտը՝ սուպերմարկետներում։

• Գույներն ու ճիշտ լուսավորությունը մեծ դեր են խաղում գնորդների ուշադրությունը գրավելու գործում։ Կարմիրը խթանում է շտապողականություն և խրախուսում գնումները, իսկ կապույտը ստեղծում է վստահության զգացողություն։ Լուսավորության շնորհիվ հնարավոր է նաև առանձնացնել կարևոր ապրանքները, որոնց վաճառքը ցանկանում եք ավելացնել։
• Գների հոգեբանական ռազմավարությունը․ ապրանքների գները հաճախ ձևավորվում են այնպես, որ թվան ավելի մատչելի։ Օրինակ՝ 9990 դրամ գինը հոգեբանորեն ընկալվում է որպես 9000-ի մոտ, ոչ թե 10000-ի։
• Անսպասելի խթաններ․ երբեմն խանութներում կազմակերպվում են անվճար համտեսներ կամ փոքրիկ նվերներ են տրվում գնումների հետ։ Սա հաճախորդներին տրամադրում է դրական հույզեր և խթանում գնումներ կատարելու ցանկությունը։

Արտադրանքի ցուցադրման կազմակերպում

«Ոսկե եռանկյունու» սկզբունք

Ոսկե եռանկյունին մերչնդայզինգի հիմնարար հասկացություն է, որն էական ազդեցություն ունի ապրանքների տեսանելիության և վաճառքի ցուցանիշների վրա: Սա այն օպտիմալ տարածքն է, որտեղ հաճախորդներն ամենաշատն են նկատում և փոխազդում ապրանքների հետ: Հետազոտությունները ցույց են տալիս, որ այս գոտում տեղադրված ապրանքներն ավելի քան 60%-ով ավելի լավ են վաճառվում:

Ըստ ոսկե եռանկյունու՝ ապրանքները նպատակահարմար է դասավորել այս ձևով.

• Պլանավորված գնումներ։ Հիմնական կամ առօրյա ապրանքները տեղադրեք եռանկյունուց դուրս՝ խրախուսելով հաճախորդներին շրջել խանութով։
• Իմպուլսիվ գնումներ։ Բարձր շահութաբերություն ունեցող փոքր ապրանքները տեղադրեք ոսկե եռանկյունում և դրամարկղի մոտ։
• Սեզոնային ապրանքներ։ Ժամանակավոր ակցիաներով ապրանքները հաճախ տեղադրվում են ոսկե եռանկյունում՝ առավելագույն տեսանելիության համար:

Հստակ և արդիական գնապիտակներ․ ապահովեք, որ բոլոր ապրանքների գները հստակ տեսանելի և ընթեռնելի լինեն։ Խուսափեք գների հաճախակի փոփոխություններից, քանի որ դա կարող է շփոթեցնել հաճախորդներին։

Ապրանքը միշտ դեմքով դեպի գնորդը․ այս կերպ ապրանքի անվանումը անմիջապես տեսանելի է։ Երբ ապրանքները դասավորված են դեմքով դեպի գնորդը, անվանումը, լոգոն և փաթեթավորումը դառնում են ավելի նկատելի և հաճախորդը կարողանում է արագ գտնել իր նախընտրած ապրանքը՝ առանց երկար փնտրելու։

«Դատարկ տարածքի» օրենք

Թողեք բավարար «շնչող» տարածք ապրանքների միջև, հատկապես թանկարժեք իրերի համար: Գերբեռնված դասավորվածությունը պակաս գրավիչ է և դժվարացնում են հաճախորդի որոշման կայացման գործընթացը:

Մեծ ապրանքները՝ ներքևում, փոքրերը՝ վերևում․ մեծ ապրանքներն ավելի հեշտ է վերցնել ներքևից, և դրանք ավելի տեսանելի են, իսկ փոքրերը կարելի է վերցնել վերին դարակներից:

Օգտագործեք տարբեր բարձրություններ՝ հետաքրքիր և դինամիկ ցուցադրություն ապահովելու համար: Ցուցադրեք ապրանքները հետևյալ բարձրություններում՝

• Աչքի մակարդակ (ամենալավ վաճառվող ապրանքներ)
• Ձեռքի մակարդակ (երկրորդ լավագույն դիրք)
• Գետնին մոտ (մեծ կամ ծանր ապրանքներ)

Ապրանքների ցուցադրում կատեգորիաներով. գնորդը պետք է կարողանա հասկանալ ապրանքների դասավորության տրամաբանությունը: Օրինակ, հագուստի խանութում շորտեր կամ կիսաշրջազգեստ կարելի է տեղադրել շապիկների կողքին,բայց շապիկների և շորտերի կողքին ձմեռային բաճկոններ կախելը անտրամաբանական է. դա կշփոթեցնի գնորդներին:

Ամփոփելով՝ նշենք, որ մերչնդայզինգը խելացի և հոգեբանական գործիքների համադրություն է, որը նպաստում է վաճառքների աճին։ Այն կիրառվում է գրեթե բոլոր ոլորտներում՝ սուպերմարկետներից մինչև օնլայն խանութներ։ Սա վկայում է, որ գնումներն ընդամենը անհրաժեշտություն չեն, այլ նաև լավ մշակված հոգեբանական ռազմավարություն, որն ազդում է մեր որոշումների վրա։

Կայք՝ brandon.am

Էլ. հասցե՝ info@brandon.am

Հեռ.՝ +374 77 870 090