Անշարժ գույքին առնչվող հարցեր

Անշարժ գույք են համարվում օբյեկտները, որոնք անհնար է հողից անջատել՝ առանց այդ գույքին կամ հողամասին վնաս պատճառելու կամ դրանց` նպատակային նշանակությամբ հետագա օգտագործման անհնարինության: Օրինակ` անշարժ գույք է համարվում հողամասը, անտառը, բազմամյա տնկիները, ստորգետնյա և վերգետնյա շենքերը և այլն:

Անշարժ գույքի նկատմամբ սեփականության իրավունքը և այլ գույքային իրավունքները, այդ իրավունքների սահմանափակումները, դրանց ծագումը, փոխանցումն ու դադարումը ենթակա են պետական գրանցման կադաստրում, իսկ համապատասխան գործարքները՝ նոտարական վավերացման:

Անշարժ գույքի ձեռքբերման հետ կապված ռիսկերը

Մինչ անշարժ գույքի առուվաճառքի պայմանագիր կնքելը երբեմն անհրաժեշտ է իրականացնել հատուկ հարցումներ և փաստաթղթերի ուսումնասիրություն՝ հետագայում անցանկալի հետևանքներից խուսափելու նպատակով: Ստորև ներկայացնում ենք առավել հաճախ հանդիպող ռիսկերը՝ կապված անշարժ գույքի առուվաճառքի հետ:

1. Անշարժ գույքի նկատմամբ առկա է ամուսինների կամ այլ անձանց ընդհանուր սեփականության իրավունք:

Օրինակ, անշարժ գույքը վաճառվում է մի անձի կողմից, ով ամուսնացած է և չի հայտնել այդ մասին նոտարին, հետևաբար բացակայում է գործարք կնքելու վերաբերյալ մյուս ամուսնու գրավոր համաձայնությունը: Ամուսինը, ում համաձայնությունը գործարք կատարելու վերաբերյալ չի ստացվել, իրավունք ունի դատական կարգով պահանջել ճանաչել այդ գործարքը անվավեր: Նման խնդիր կարող է ծագել նաև, եթե գույքը հանդիսանում է մի քանի անձի ընդհանուր սեփականություն:

2. Հողամասի նկատմամբ կարող է սահմանվել հարկադիր սերվիտուտ:

Հողամասի սեփականատերերը կամ օգտագործողներն իրավունք ունեն հարակից հողամասի սեփականատիրոջից պահանջել իրենց տրամադրել այդ հարակից հողամասի սահմանափակ օգտագործման իրավունք (սերվիտուտ): Հարկադիր սերվիտուտը սահմանվում է դատարանով: Հողամասի առուվաճառքի պայմանագիր կնքելուց առաջ՝ անհրաժեշտ է համոզվել, որ հետագայում նման խնդիր չի առաջանա (այն է՝ ստուգել՝ արդյո՞ք հարակից հողամասերի սեփականատերերը տեսականորեն կարող են պահանջել Ձեր ապագա գույքի նկատմամբ սահմանել հարկադիր սերվիտուտ):

3. Վաճառված գույքը օրինական սեփականատիրոջ կողմից հետ պահանջելու ռիսկը:

Օրինակ, երբ կեղծ լիազորագրով անձը վաճառում է գույքը մեկ գնորդի, այդ գնորդը՝ մեկ այլ գնորդի և այլն: Նման դեպքում սկզբնական օրինական սեփականատերը, ում գույքը խաբեությամբ վաճառել են, իրավունք ունի դիմել դատարան և հետ պահանջել գույքը վերջին գնորդից նույնիսկ այն դեպքում, եթե այդ գնորդը հանդիսանում է բարեխիղճ ձեռքբերող և չէր կարող իմանալ, որ իրեն վաճառված գույքը ժամանակին կեղծ լիազորագրով է վաճառվել:

4. Երրորդ անձանց իրավունքներով ծանրաբեռնված անշարժ գույքի ձեռքբերման ռիսկը:

Օրինակ, անշարժ գույքը կարող է գրավադրված լինել, տրված լինել վարձակալությամբ, անհատույց օգտագործման և այլն: Նման դեպքերում հնարավոր է, որ անձը գնել է անշարժ գույք, սակայն դրանից առաջ վաճառողը արդեն իսկ կնքած է եղել, օրինակ, վարձակալության պայմանագիր, որը սակայն դեռևս գրանցված չէր կադաստրում: Այդ դեպքում կադաստրից ստացված միասնական տեղեկանքով հնարավոր չէր լինի պարզել գույքի՝ երրորդ անձանց իրավունքներով ծանրաբեռնված լինելը:

Անշարժ գույքի գործարքները հնարավոր է կնքել կադաստրում՝ առանց նոտարական գրասենյակ այցելելու: Անհրաժեշտ է անձամբ ներկայանալ կադաստր, լրացնել օրինակելի պայմանագիրը և կադաստրի համապատասխան պաշտոնատար անձի ներկայությամբ ստորագրել այն: Այս դեպքում հնարավոր չէ պայմանագրում սահմանել որևէ հատուկ կամ լրացուցիչ պայման (պայմանագիրը ունի օրինակելի ձև) կամ գործարքը կատարել լիազորված անձանց միջոցով:

Կայք՝ www.adwise.am
Էլ․ հասցե՝ info@adwise.am
Հեռ․՝ 060 54 12 95