Հաճախ հանդիպող սխալներ, որոնք թույլ են տալիս ստարտափները

Ստորև ներկայացված են ստարտափների կողմից թույլ տրվող ամենահաճախ հանդիպող 9 սխալները, որոնք հաշվի առնելով կարելի է խուսափել դրանցից:

1. Գործողությունների պլանավորման բացակայություն

Ստարտափի հաջող մեկնարկը, իհարկե, կարևոր է, սակայն պակաս կարևոր չէ հետագա քայլերի պլանավորումը: Շատ հաճախ սկսնակ ձեռնարկատերերը անտեսում են այս քայլը, որի արդյունքում էլ խճճվում են բիզնեսի կառավարման դժվարությունների մեջ և ձախողվում: Պլանավորումը համարվում է անհրաժեշտ գործիք՝ բիզնեսը ճիշտ կառավարելու և զարգացնելու համար: Պլանավորումը կարելի է իրականացնել բիզնես պլանի, մարքեթինգային պլանի և ֆինանսական պլանի միջոցով, որոնք կօգնեն հստակ պատկերացում կազմել ողջ բիզնեսի ակնկալիքների, նպատակների և հետագա քայլերի մասին, և որի արդյունքում ձախողվելու հավանականությունը կնվազի:

2. Սխալ ժամանակին և սխալ տեղում

Բիզնես գործունեություն սկսելու համար ժամանակը և տեղը շատ մեծ դեր են խաղում: Մինչ ընկերության բացման օրը պետք է ամեն ինչ մտածված և պատրաստ լինի, քանզի փորձը ցույց է տվել, որ ընկերության բացումից հետո կամ գործունեություն ծավալելու ընթացքում էական փոփոխություններ կատարելը՝ ինչպես օրինակ կոնցեպտի կամ ընտրված սեգմենտի փոփոխությունը բացասաբար է ազդում ընկերության գործունեության վրա: Պետք է ուսումնասիրել շուկան և հասկանալ, թե որն է ամենահարմար տեղը ապրանքը վաճառելու և հաճախորդներին հնարավորինս մոտ լինելու համար: Պետք է վստահ լինել, որ այն ապրանքը, որը Դուք պատրաստվում եք վաճառել, շուկայում ունի պահանջարկ, բացի այդ պետք է նաև վստահ լինել, որ ապրանքը լիովին պատրաստ է շուկայում ներկայացնելու համար: Մյուս կողմից, չպետք է ուշացնել ստարտափի մեկնարկը, քանզի մրցակիցները կարող են առաջ անցնել, և շուկային առաջինը ներկայացնել այն: Կախված ապրանքի կամ ծառայության բնույթից հաշվի առեք սպասվող մեծ իրադարձությունները, միջոցառումները և տոները: Օրինակ, եթե մեկնարկեք Ձեր գործունեությունը դեկտեմբեր ամսին, հավանաբար դրան բավականաչափ ուշադրություն չի դարձվի՝ հաշվի առնելով համացանցում իշխող ամանորյա թեմայով գրառումները և տոնական ակցիաները: Հակառակ դեպքում, եթե Ձեր ապրանքը կամ ծառայությունը սերտ կապված է հենց տվյալ տոնի հետ, ապա այն մեկնարկելու համար ավելի հարմար ժամանակահատված հավանաբար չի լինի: Հաճախ ստարտափները ձախողվում են այս ամենը հաշվի չառնելու պատճառով, հետևաբար խորհուրդ է տրվում սահմանել վերջնաժամկետներ և ձգտել հասնել դրանց՝ համոզված լինելով, որ ընկերությունը լիովին պատրաստ է բացման:

3. Ոչ հստակ նպատակների սահմանում

Սահմանելով հստակ նպատակներ՝ Դուք կհասկանաք, թե որտեղից պետք է սկսեք Ձեր բիզնեսը և ուր պետք է հասնեք: Իմանալով բիզնեսի զարգացման ուղղությունը՝ Դուք կմշակեք հատուկ քայլեր, որոնց օգնությամբ կհասնեք Ձեր առջև դրված բիզնես նպատակներին:

4. Սեփական ապրանքի ու ծառայության թերագնահատում

Հաճախ սկսնակ բիզնեսի ղեկավարների վստահության պակասը և ձախողվելու վախը պատճառ է հանդիսանում թերագնահատելու սեփական ապրանքը և ծառայությունը: Արդյունքում նրանք նվազեցնում են ապրանքի և ծառայության գինը, և դա ազդում է նաև բրենդի ընկալման վրա, իսկ այդ ամենը վերականգնելը շատ երկար ժամանակ է պահանջում: Այդ իսկ պատճառով հարկավոր է մինչ բիզնես սկսելը պատշաճ ուսումնասիրել շուկան և վստահ լինել սեփական հնարավորությունների և արտադրանքի կամ մատուցված ծառայությունների որակի վրա:

5. Ոչ համապատասխան աշխատակիցների ներգրավում

Ստարտափները սովորաբար իրենց գործունեությունը սկսում են միջինում 3-4 աշխատակիցների ներգրավմամբ: Նրանք աշխատում են օրական 18 ժամ իրենց գաղափարը հանրությանը ճանաչելի դարձնելու համար: Սխալ աշխատակցի ընտրությունը մեծ ազդեցություն կունենա ընկերության վրա:

Հետևաբար ճիշտ աշխատակիցների ընտրությունը մեծ դեր է խաղում ընկերությունում, քանի որ նրանցից է կախված ընկերության գործունեության ապագան:

6. Խուսափում նոր տեխնոլոգիաներից

Տեխնոլոգիաների առկայությունը հեշտացնում է ցանկացած ոլորտի բիզնես գործունեությունը: Այն ստարտափի հիմնադիրներին կարող է ապահովել նոր հնարավորություններով, օգնել նրանց աշխատանքը դարձնել ավելի արդյունավետ և անգամ գումար խնայել: Ճիշտ է, նոր տեխնոլոգիաների ներդրումը պահանջում է սովորելու և այն կիրառելու համար որոշ ժամանակ և միջոցներ, սակայն այդ ամենից հրաժարվելը կարող է բացասաբար ազդել Ձեր բիզնեսի զարգացան վրա:

7. Թիրախային հաճախորդի սխալ ընտրություն

Հաջողված մարքեթինգի ամենակարևոր քայլերից մեկը հաճախորդների ճիշտ թիրախավորումն է: Հարկավոր է իրականացնել շուկայի ուսումնասիրություն՝ հստակեցնելու համար, թե որ հաճախորդներին եք ցանկանում ներգրավել, որտեղ կարող եք նրանց փնտրել և ինչպես նրանք կարձագանքեն Ձեր մարքեթինգային գործողություններին: Ամենահաճախ հանդիպող սխալներից մեկն այն է, որ փոքր բիզնեսի ղեկավարները իրենց պոտենցիալ հաճախորդ համարում են բոլորին, փոխարենը հարկավոր է թիրախավորել և ընտրել հաճախորդների կոնկրետ խումբ, նրանց ուղղակիորեն հասնելու և ապրանքը գովազդելու համար, ինչը նաև կխնայի մարքեթինգային ծախսերը:

8. Ծախսերի սխալ կանխատեսում

Նոր բիզնես սկսելիս յուրաքանչյուր ղեկավար պետք է գիտակցի, որ սովորաբար բիզնեսը զարգանում է աստիճանաբար, և հնարավոր է սկզբնական ժամանակաշրջանում չապահովի եկամտաբերության բարձր շեմ: Մի շարք ստարտափներ դադարեցնում են իրենց գործունեությունը միայն այն պատճառով, որ առաջին մի քանի ամիսների ընթացքում աշխատել են վնասով: Նման խնդրից խուսափելու համար անհրաժեշտ է իրականացնել բյուջետավորում՝ հաշվի առնելով առաջին մի քանի ամիսների գործունեության անընդհատության ապահովման համար անհրաժեշտ միջոցները: Բյուջետավորումը նաև կօգնի փոքր բիզնեսի ղեկավարներին խուսափել հավելյալ ոչ պարտադիր ծախսերից:

9. Մարքեթինգային գործողությունների անտեսում

Սկսնակ ձեռնարկատերերը անտեսում են մի շարք մարքեթինգային գործողություններ, որոնք կարող են լայն ճանաչում բերել ընկերությանը: Ստարտափների համար նպատակահարմար է իրականացնել առցանց մարքեթինգ, որը մեծ ներդրումներ չի պահանջում, և համարվում է քիչ ծախսատար: Ստարտափները պետք է հասանելի լինեն առցանց, քանի որ սպառողների մեծ խումբ նոր ապրանքը կամ ծառայությունը առաջին հերթին փնտրում են համացանցում: Մինչ վեբ կայք ստեղծելը՝ փոքր ընկերությունները կարող են գործել մի շարք սոցիալական ցանցերում, և կարող են հաջողության հասնել՝ ներգրավելով նոր սպառողների: